Riangdo, Nohprah10: Ki paidbah ka thaiñ Mawshynrut baroh kawei, ki la pynkynmaw biang bad dawa ruh na u MLA jong ka thaiñ u ba dang shu jop shen kata u Bah Methodius Dkhar, ban pynurlong noh ïa ka Mawshynrut Civil Sub Division ba pura, kumba la ju angnud bad ap khmih lynti da ki paidbah nongshong shnong baroh shikatta.
Ki paidbah ki la pynpaw ba ka mat ba hakhmat ka dei khamtam ka roi ka par bad ka kyrdan longrynieng jong ka thaiñ Mawshynrut, kaba watla ka la ïoh ïa ka Civil Sub Division la katto katne snem mynta, pynban ym pat don jingkylla ei ei wat tang khyndiat ruh hynrei ka dang ïaineh sah kumjuh.
Na ka liang ki ba bun ki paidbah ki la pynpaw ba watla ha kine ki snem ba la leit ki la kyntur sha u MLA barim u ba long ruh ha kajuh ka opor u MDC, ba um shimkhia ban pynkylla dur noh. Hynrei, imat um shym la lah satia ban leh kumta watla u don ha ka sorkar baroh san snem lynter. Kumta ki la ong ba mynta ki khmih lynti bad ki da kyrmen skhem ruh ba u MLA ba thymmai un pyni ba ki kam ki kren kham jam shisha.
Katto katne ki riew rangbah ki bym da kwah than ban pynpaw kyrteng, ki la ong ba la donkam kyrkieh ruh ban pynkiew noh ïa ki jingthiah ki nongpang ha Riangdo CHC. Ban wanrah bad thung noh ïa u SDMO, nangta ban wanrah noh ïa ki Specialist ban sumar ïa ki khunlung bad longkmie (pediatric & gynecologist).
La donkam wanrah noh ïa ki tiar sumar nongpang kum ki X-Ray bad Ultrasound Machine, ban pynkiew ïa ki jingdon jong ki Nurse bad ki nongtrei ha ka jaka sumar, khnang ban lah ban ai ka jingshakri ka janai sha ki paidbah. Namar ka Mawshynrut Civil Sub Division ka la long ka jaka ba kham ïar bad ka nang bun bad nang kiew ka jingbun ki paid nongshong shnong.
Nalor kine ki mat ba kham kongsan, ki la pynpaw ruh ïa kiwei kiwei ki mat kiba ïa dei bad ka bha ka miat bad ka roi ka par jong ki paidbah nongshong shnong ka thaiñ, kiba yn ym lah ban jer lut hangne. Hynrei, ki don ka jingkyrmen kaba skhem ba u Bah Methodius Dkhar, kum u nongmihkhmat sha ïing dorbar thaw aiñ ha ka liang synshar, u don ha ka bor bad lah ban leh shibun kiei kiei na ka bynta ki paidbah ka thaiñ.
