Nongstoiñ, Rymphang, 21: Ar ngut ki kyrtong ïaleh elekshon MDC na Nongstoiñ, kata u samla Michael Thongni kyrtong MDC shimet bad u bah G.Ningstar Marthong kyrtong MDC na ka seng Congress, ki la kren artatien lypa ba kin ym poi satia sha ka jingjop ha ka elekshon MDC ba mynta.
Kine ki ar ngut ki kyrtong, hadien ba ki la dep ban pyndep ïa ka kamram ban thep vote, ki la pynpaw ha u nongthoh khubor, ba ki paidbah lehse kin ai ïa ka jingkyrshan ha kane ka sngi, hynrei ka don ka jingartatien ha ki ba kin poi sha ka thong. Tangba, mano ban tip ïoh lehse kin poi sha ka nam jop ha ka sngi ba ñiew ïa ki vote.
Kitei ki kyrtong ki la ai khublei kyrpang ruh ïa baroh ki paidbah kiba la mih naduh mynstep ban ïeng ha u laiñ, ban ïoh ïa ka pali ban thep vote. Ha kajuh ka por ki la pynpaw ruh ïa kajuh ka jingmut ba wat lada kim poi sha ka thong ruh, hynrei kin ym sangeh ïa ka ban shakri paidbah.
