Shillong, Nailur 13: Kumba long lem kiwei ki klob ha ka pyrthei, ka jingkiew bad jingriewspah jong kano kano ka kynhun ka dei lyngba ka jingkyrshan ba ki paidbah ki ai da kaba wan sakhi ïa ki jingïalehkai.
Na ka liang jong u Head coach ka Northeast United FC- u Juan Pedro Benali u la kyntu ïa ki paidbah jong ka thaiñ ba kin noh jingïarap sha ka klob da kaba wan sakhi ïa ki jingïalehkai khamtam lada ka ïakhun hala ïing.
“Lada phi kwah ban kyrshan lem ban pynmih pisa na bynta ka klob…phi dei ban wan peit ïa ki jingïalehkai ka NEUFC,” u la ong da kaba bynrap ba kane kan ïarap shibun ïa u trai ka klob (John Abraham) ban nang pynïar ïa ki jingthmu jong ka klob ban kyntiew ïa ka phutbol ha kylleng ki jylla ka thaiñ shatei lammihngi.
Hadien ba ka klob ka la ïohrah ïa ka Durand Cup 2024, da kaba pynliem ïa ka lahduh ba ïada ïa ka burom ha ka ISL – ka Mohun Bagan Super Giant ha ka jingïakhun kaba itynnat kaba la jam sha ka penalty, ka jingkhmihlynti na ki nongkyrshan ka la nangjur.
“Ka jingkhmihlynti na ki nongkyrshan kan ïai don beit. Ngi sngew kmen na bynta kane. Ngi kwah ban khmieh shalor ryngkat ka jingsngew skhem bad ha kajuh ka por Ngi kwah ban pynleit jingmut thikna ha ki jingïakhun,” u la bynrap.
Ka NEUFC kan sdang ïa ka ISL 2024-25 pyrshah ïa ka Mohammedan SC ha Kishore Bharati Krirangan, Kolkata, 16 tarik Nailur.
