Kyntu ki nongïalam Balang ban khot ïakren ka sorkar halor ka ishu Mukroh

Shillong, Naiwieng 27 : Ka kynhun jong ki nongïalam niam ha rilum Khasi – Jaiñtia hapoh ka lama jong ka Khasi Jaintia Christian Leaders Forum (KJCLF) ka la kyntu ïa ki kynhun bapher bapher ba kin long kiba jai jai ha ka jingïakhun ban ïoh ïa ka jingjop haba ïadei bad ka ishu Mukroh kaba haduh san ngut ki rangbah Khasi ki la duhei ïa la ka jingim ha ka jingshah siat ha ki pulit Assam. Nalor kata ka kyntu ruh ïa ka sorkar ban khot ïakren bad ïa pynbeit lang halor kane ka kam khnang ban lait mih ki jingthut ka shongsuk shongsaiñ ha ka jylla.
Katkum ka kyrwoh ba la phah da u Secretary ka KJCLF, Dr. EH Kharkongor ka kynhun ka la ong, “Ka KJCLF ka kit lang ïa ka jingsngewsih ba kthang jong baroh ki longiing kiba mad ïa ka jingduh jong ki ïa la ki jong ki dkhot ha ki jingjia ba sngewsih ha ka shnong Mukroh, bad ruh ïa ka jingdukha mynsiem jong ki jaidbynriew bad kynhun bapher bapher kiba la pynpaw ïa la ki jong ki jingsngew ha ki rukom bad ki lad ba bunjait kylleng kylleng ki jaka ha kine ki khyndiat sngi ba la dep.”
Shuh shuh la ong ruh ba hadien ba ki ïohi ïa ka jingkhih bitar kaba la mih ha kiba bun rukom, na ka liang ka kynhun ki nongïalam niam ka kyntu ïa baroh ba kin pynjai jai ha ka jingpyrshang ban ïoh ïa ka jingjop halor ki jingeh kiba bun kiba yn ym lah ban ïoh da ki jingleh jubor.
“Ka la don ka jingthut kaba khraw ha ki kam jingkamai kajih bad kiwei, khamtam ruh ka jinglynga kaba jur na ka bynta ki khynnah pule ha ki jingpule bad ki eksamin jong ki. Dei ban pynshitom ïa kito ki riew-dakaid kiba pynsniew bad pynbudnam ïa ka kyrteng bad burom jong ki kynhun kiba ïakhih bad ïaleh na ka bynta ka hok,” bynrap shuh shuh ka kyrwoh.
Ha kajuh ka por ka KJCLF ka kyntu ruh ïa ka Sorkar Jylla ban pyni ïa ka jingtbit bad jingsngewlem jong ka haba ka buddien ban wanrah ïa ki jubab bad ki jingpynbeit halor kine kiei kiei kloi katba lah.
Lah ban pynkynmaw ruh ba u dei u MLA jongka Mawlai Constituency u bah Process T Sawkmie uba la kyntu nyngkong eh ïa ka sorkar ba ka dei ban khot ïakren ïa ki seng bhalang, ki Rangbah Shnong kynthup ïa ki Rangbah Shnong ka Mukroh, ki Nongïalam Niam khnang ban ym pur bad jur ki jingïa kulmar namar kane ka dei ka por long eksamin ki khynnah skul bad samla pule. Nalor kata lada jia ba mih ki jingkulmar ki ban shah ktah kin dei kiba duk ba rangli, ki kup shilliang ki sem shilliang bad kiba kamai kyndoi jakpoh namar baroh baroh la ïatip ba kane ka dei ka aiom ban poi artat ka Khristmas bad Snem Thymmai kumta ki jinglut kiba bun nalor ba hap ban siew ruh sa ka baiskul.