Shillong, Naiwieng 27: Hadien ba ka mih ka jingthut ka shongsuk shongsaiñ ha ka jylla khmatam eh ha ka nongbah Shillong hadien ba ka jia ka jingshah siat ïap ki san ngut ki Khasi bad uwei u Pulit Assam ha Mukroh, ka Thma U Rangli Juki (TUR) bad ka Civil Society Women’s Organisation (CSWO) mynta ka mynta ka sngi ka la khot ïa ki nongshnong shnong ka jylla sha ka jingïalang ban wanrah biang pat ïa ka suk ka saiñ ha nongbah Shillong kaba yn pynlong ha Don Bosco Youth Center, Laitumkhrah ha ka por 2 baje nohsngi.
Kane ka jingïalang ba la khot da ka TUR bad ka CSWO ka dei khmatam halor ka jingmih ki riewshit khlieh bad riew shimkabu kiba kwah ban thaw jingkulmar bad pynkha ïa ka jingïakynad jaidbynriew kiba la tied la bom ïa ki briew kiba lui lui kiba ïaid ha lynti ha, syngkien ki bym tip ei ei ïa ka duh ka dang.
Shuh shuh kane ka jingïalang ka long ban pyni ïa ka jingbym sngew mynjur bad ki jingleh ki bor synshar ha kaba ki riewshim kabu ki lait na ka jingpynshitom jong ka Aiñ bad ym ju don ka jingbishar bad jingpynshitom ïa ki nongleh beaiñ. Kane ka jinglong ka buh ïa ka imlang sahlang, ka treikam treijam bad synshar khadar ha ka jingma ba khraw.
“Ka por ka dei ba ngin ïeng ban pynrem, ban kren ïa ka jingshisha , ban ïatai bad ba ym dei shuh ban shah ba kane kan ïai jia. Kumta ngi khot ngi wer ïa phi baroh sha ka jingïalang na ka bynta ban ïatai bniah halor ka hok, ka bishar bad ka jingsuk,” ong ka kyrwoh na ki ar seng.
