Kyntu ki bor pynïaid district ka EKH ïa ki nongïalam shnong ban ïatreilang halor ka SIR

Shillong, Jymmang 19: Kum shi bynta ban pynbeit ïa ka Electoral Roll ka East Khasi Hills District ka la sdang ïa ki jingpynkhreh na ka bynta ka Special Intensive Revision (SIR) jong ka Electoral Roll bad pynbna ïa ka jingleit pynshisha ïa baroh ki nongthep vote ha man la ki thliew ïing kiba hap ha palat 1000 tylli ki polling station.
Katkum ka kyrwoh khubor la ong ba kane ka SIR, kaba la leh halor ka jingbthah jong ka Election Commission of India (ECI), ka buh ïa ka Meghalaya ha ka Phase-III jong ka jingpynthymmai ïa ka Electoral Roll bala leh ha baroh kawei ka ri. Ki bor District ha ka sngi Nyngkong, kila batai ïa ki nongmihkhmat na ki seng saiñ pyrthei ba la ïoh jingithuh ha Shillong halor ka roadmap, ka por ba la buh bad ka rukom pynïaid ïa ki kam jong kane ka SIR.
La ong ba ki bor khmih ki pyntip ba ka East Khasi Hills District ïa mynta ka don 17 tylli ki Assembly Constituency bad 1021 tylli ki Polling Station.
Kat kum ka por ba la buh ban leh ïa ka SIR ba la pyntip ha kane ka jingïalang, ki Block Level Officer (BLO) kin leit rung na kawei ka ïing sha kawei pat ban pynshisha ïa ki nongthep vote naduh ka 30 tarik Jylliew haduh ka 29 tarik Naitung, katba ïa ka draft electoral roll yn sa pynmih ha ka 5 tarik Nailar. Ïa ka electoral roll kaba khatduh la buh ban pynmih ha ka 7 tarik Risaw, 2026.
La bthah ïa ki seng saiñ pyrthei ba kin thung ïa ki Booth Level Agent (BLA) ha man ki polling station ban pynthikna ïa ka jingtreikam kaba shai bad ka jingïashimbynta ba shitrhem ha kane ka jingpynthymmai ïa ka electoral roll.
La ïathuh ruh ba ka ophis ka Deputy Commissioner kan sa thoh sha baroh ki Dorbar Shnong ha ka District ban pyntip sha ki halor ka SIR bad ban pan ïa ka jingkyrshan bad jingïatreilang jong ki Dorbar Shnong ha ka ban sam ïa ki jingtip sha ki nongthep vote halor ka jingwan rung ki BLO sha ki ïing ki sem jong ki bad ka jingbishar kyrteng ka ban pynlong da ki Electoral Registration Officer.
Shuh shuh na ka liang ka District Election Officer ka la kyntu ïa ki seng saiñ pyrthei, ki nongthep vote bad ki kynhun ba don bynta lang ha ka kam ba kin ïatreilang bad ki briew ka tnad election ban pynthikna ha ka ban wanrah ïa ka electoral roll kaba beit, kaba ïaid beit ïaid ryntih, kaba kynthup lang bad kaba lait na ki jingbakla.