Jowai, Jymmang 15: Ka Khasi Jaiñtia Youth & Student Union lyngba kane ka kyrwoh ka kyntu ïa ki paidbah ka Bri U Hynñiewtrep ba kidei ban peitngor bha haba ki thied ïa ka umphniang Petrol bad Diesel na baroh ki Petrol Pump kiba don ha kylleng ka jylla.
Ka seng ka ai ïa kane ka jingkyntu hadien baka la lap ba ki don shibun ki Petrol Pump kiba lehthok bad shim kabu na ki riew paidbah. Hynrei ka seng kam pat kwah ban leh kyrkieh pyrshah ïa kine ki Petrol Pump kumta ka dang ai tang ki jingmaham ïa kine ki Petrol Pump ba leh thok bad ka jingkyntu ïa ki paidbah ba ki dei ban long kiba husiar bad peitngor bha ïa ka density ïa ka dor bad ki meter hashwa ba kin thep umphniang.
Ka density ka Petrol ka long 720-775 kg/m 15’C bad ka Diesel ka long 820-860 kg/m 15’C bad ka dor kumba long mynta ka petrol Rs. 95.84 bad ka diesel ka long Rs. 87.24. bad ki dei ruh ban peit ba u meter ula dei Zero bad ka rukom ïaid u meter haba ki theh ba u dei ban ïaid serial 12345678….. bad kumta ter ter bad um dei ban jump.
Ka seng ka maham tyngeh ruh ïa baroh ki Petrol Pump kiba don ha ri Khasi Jaiñtia ba kidei ban pynbiang baroh ki aiñ ki kyndon bad kim dei ban lehthok leh shukor ïa ki paidbah nalor ba kiew saka dor bad saka lehthok te kan ktah arshah laishah ïa ki paidbah.
Na ka liang ka seng ka maham jur ïa baroh ki Petrol Pump ba lada ka dang lap ïa ki kam thok kam shukor te kan leh daka ba tyngeh kat kum ki kyndon aiñ. Ïa kane ka khubor la phah da u bah C. Phawa President Rangbah bad u bah C. Shullet General Secretary.
