Shillong, Jymmang 15 : U Myntri ba peit ïa ka tnad Bording, u AT Mondal ha ka sngi Palei u la ong ba ka jinghiar ka um ha dam Umïam kam don jingïadei eiei bad ka jingmaramot ïa ka dam.
Haba ïakren bad ki lad pathai khkubor, u Myntri u la ïathuh ba u shah phone ha bun ngut ki briew kiba pynpaw ïa ka jingsngewkhia halor ka jinghiar ka um bad kynnoh ruh ba ka lah ban dei hadien ba la maramot ïa ka dam .
“Em, kane kam don jingïadei ei ei bad ka jingmaramot ïa ka dam. Ka um ka don ha kata ka kyrdan namar kadei kaba ngi la buh ïa ka,” u la pynshai.
Shuh shuh u ong ba kumba ki la dep ban kular ba kan ym don kano kano ka jingpynlip bording ha ka por rkhiang khamtam ha ka por eksam, kumta ki la buh pynap lypa ïa ka um namar kim shym la tan bording tang na dam Umïam hynrei na kiwei ruh ki tyllong.
“Mynta ba ka um ka la hiar kam mut pat ba ka don ka jinglait ei sharud jong ka um hynrei kadei namar ba ngi la sdang ban tan ïa ka namar kam don jingmut ban buh than ïa ka um naba ka aiom slap ka la wan,” la pynshai shuh shuh u Myntri.
