Khliehriat, Lber, 18: Ki nongïalam jong ka Jaiñtia National Council (JNC) Jalaphet Circle ha ka sngi Baar hapoh ka jingïalam u General Secretary Bah Giken Langstang ki la leit ban ïakynduh markhmat bad u Executive Engineer jong ka tnat bording, MePDCL Khliehriat Division u bah Micheal pohshna ha kaba ki la pynsngew bad pynpaw ka jingsngew khia halor ka jingbym ker bha ïa ka machine transformer kaba don ha shnong Jalaphet bad ha kiwei kiwei ki shnong, halor kane ka seng ka la buh ruh da ka jingthoh hakhmat u EE.
“Ka seng ka la ioh ruh ban pynpaw ïa ki kyrteng jong ki jaka ba kynthup ka ThnaMulait, Urshuni, Lad shur shur, Shur Shur, Lad Narwan, ha kaba kine ki shnong ruh la i donkam shisha ban ioh jingker jingda ba paka ïa ki machine transformer khnang ban lait na kano kano ka jingjia ka ba sngewsih, ngi sngew khia namar ha ki jaka kiba don ha ki shnong nongkyndong ka ju jia ka jingshah bat bor ding ïa ki briew bad ïa ki mrad ruh bad kane ka dei kawei na ki dawbah ba namar ka tnat bor ding kam shim khia eiei ban ker bha ïa ki jaka ba buh ïa ki machine Transformer”ong u kyrwoh.
“Ha ka jingïakynduh bad u EE jong ka tnat bor ding, utei u heh jong ka tnat u la ong ba kane ka kam ka hap hapoh ka jingpeit jong u SDO bad ka seng ka la ioh ban ïakynduh bad u SDO bad na ka liang jong SDO u la ong ba halor kane ka kam um don bor eiei ban leh bad la bynrap ruh ba ïa kane ka kam hap ban peit da ki bor kiba halor kaba mut na Headquarter jong ka jylla”
“Ka seng ka dap da ka jingsngew lyngngoh ba kat u SDO um don bor eiei ban leh ha kaba ïadei bad ki kam bording kiba hap hapoh ka jingpeit jingkhmih jong u bad ka seng ka la ioh jingtip ruh ha kane ka sngi ba dang bun ki jaka hapoh ka thaiñ kiba iakynduh ïa kane ka juh ka jingeh bad haduh mynta ruh kim pat ioh ïa ka jingangnud ka jong ki halor ka jing kyntu ban ioh ïa ki jingker kiba paka ïa ki machine transformer kiba buh jingma haduh katta katta ïa ki nongshong shnong khamtam ïa ki khynnah bad leit ba wan bad ki jingri kiba don ha ki shnong ki thaw”
“Ka seng ka buh ruh ïa ka jingmaham ïa ka tnat bording khamtam ïa ka Khliehriat Division ba lada kane ka tnat kam don bor ban shim khia ïa ka jingthrang ki paidbah khamtam ha ka kam iap kam im jong ki paidbah la dei ban khang noh shisyndon namar ban shu shong rieh tngen ha kine ki jaka khlem da trei hok ïa ka kam kumba la bynshet kam myntoi shuh ban plie ïa kane ka tnad, ka seng kan sa shim da kiwei pat ki sien jam lada kane ka bynta ban ker ïa ki transformer kam shym long kam eiei”pynkut u kyrwoh.
