Shillong, K’Lyngkot 04 : Ka Bharatiya Janata Party (BJP) ha ka sngi Palei ka la kyntu ïa ka kynhun kiengatiar jong ka HNLC ba kan ym pat weng ïa ka jingïakren ïa suk bad ka sorkar pdeng kumjuh bad ka sorkar jylla na ka bynta ka shongsuk shongsaiñ ha ka jylla.
Ïa kane la pynpaw da u National Vice President ka BJP, u Dr. Chuba Ao haba kren bad ki lad pathai khubor ha Shillong. “Ngi kyntu ïa ki kynhun kieng atiar ba kin mih shakhmat ban wanphai noh bad pynneh ïa ka suk ka saiñ,” u la ong.
Haba bynrap lang, u State President ka BJP u Rikman G Momin u la ong ba ki kyntu ïa ka HNLC ba kan mih shakhmat ban bteng ïaka jingïakren ïa suk bad ka sorkar jylla kumjuh bad ka sorkar pdeng.
Katba na ka liang u nongai ktien ka party uba dei ruh ha kajuh ka por u ophisar pulit ba la shongthait, Bah M Kharkrang u la ong ba ka party ka lyngoh ïa ka jingweng kyndit jong ka HNLC ïa ka jingïakren ïasuk bad ka sorkar. Katkum ka jingong jong u, kam long satia kaba suk ïa ka sorkar hangto hi ban weng lut ïa ki mukotduma pyrshah ïa ki nongialam bad dkhot jong ka kynhun.
“Ka jingthmu jong ki ka long ban weng noh ïa baroh ki mukotduma pyrshah ïa ki nongïalam bad ïa ki dkhot ka kynhun. Nga sngew ba ki dei ban ap shwa namar kam dei kaba suk ïa ka sorkar ban shu weng kumto ïa ki mukotduma khamtam ïa kito ki mukotduma kiba la dep ban pynngat kyndon bad la poi sha iingbishar,” u la ong.
Ha kajuh ka por u ong ruh ba donkam ban pyrkhat ïa kito ki lanot kiba la ngat ha kum kitei ki jingjia. Utei u heh pulit u ong ruh ba kadei ka rai kyrkieh jong ka HNLC ban weng noh ïa ka jingïakren ïasuk. U ong ruh ba ka kynhun ka ladei ban ai ïa ka lad na ka bynta ban ïa kren ïa suk.
