Shillong, Jylliew 24: Ka All Khasi Meghalaya Tourist Taxi Association (AKMTTA) ka la dawa na ka sorkar jylla ban sangeh ka jingïatreilang hapdeng ka Meghalaya Tourism Development Corporation (MTDC) bad ka STEMS naba kane kan ktah ïa ka kamai kajih jong ki trai kali tourist taxi bad ki nongñiah kali.
Ha ka shithi ba la phah sha u Director ka Tourism, u President ka AKMTTA u Bah R Dohling u la ong, “Ha kaba ïadei bad kane ka jingpynbna ba la pynmih da Chairman, Meghalaya Tourism Development Corporation Ltd, Shillong la pynbna ba kan don ka jingïatreilang bad ka STEMS kaba la treikam naduh ka 22 tarik u Jylliew, kumta na ka liang ka seng All Khasi Meghalaya Tourist Taxi Association ka kwah ban pyntip ba ka All tourist taxi owner and driver kiba dei kiba seng kam lajong lyngba kaba ñiah kali ka la shah ktah halor kane ka kam.”
U la ong ba ka permit ba la ai sha ki Meg bus kan ktah ïa ki Meg bus ha kaba kine kin knieh noh ïa ka kamai kajih jong kiba ñiah kali tourist.
“Kumta ha kaba ïadei bad kane na ka liang jong ka association ka la kyrpad jur ïa ka sorkar ban pynsangeh ïa ka jingpyntreikam bad ka Meghalaya Tourism Development Corporation bad ka STEMS kumba ka long ha kane ka por ,” ong u Bah Dohling.
