Kyntu ka Dr. Ampareem ïa ki ophisar ban peit ïa ka jingdonkam ban kyntiew kyrdan ka Smit PHC

Shillong, Jylliew 25: Ka Myntri ka tnat ka Koit ka Khiah jong ka Sorkar Jylla ka Dr M Ampareen Lyngdoh ha ka sngi Nyngkong ka la plie ïa ka X-Ray Unit kaba don ha Smit Primary Health Centre ha ka jingdonlang Dr Joram Beda Commissioner and secretary Health and Family welfare bad Dr F. V Kharshïing, Director of Health Service (MI) bad kiwei.
Haba kren ha ka jingïalang ka Dr M Ampareen Lyngdoh ka la ong ba ka la poi ha katei ka jaka ym tang ban shu plie ïa kane ka X-Ray Unit facility hynrei ban peit ruh ïa ka jingïaid shaphrang jong ka kam ha kane ka PHC. Ha ki bnai ba la dep hadien ba ka la leit jngoh ïa kane ka PHC ka la ïohpdiang ka jingkyrpad na ka Dorbar ban kyntiew kyrdan noh ïa kane ka PHC sha ka CHC bad ka jaka ruh ka la dep don lypa, bad na ka bynta kane ki engineer ki la trei ïa kane ka kam mynta.
Ka la ong ruh ba kadei ban don ka jingïadei kaba jan bha hapdeng ki Officer bad ki paidbah khang ban lah ban poi sha ka thong. Ka la kyrpad ruh ïa ki officer jong ka tnat ban buddien ïa kane ka jingtyrwa jong ka Dorbar Shnong.
Ka la ong ba ka don hangne ban shakri ïa ki paidbah, wat la ki dei kino kino ki nongpang, kaei kaba donkam ka long ban ïada ïa ka jingim ki briew. Ka la kyntu ïa baroh ki doktor sorkar ban ïatreilang ha kti ha kjat bad ka dorbar shnong na ka bynta ka jingbiang ki kam shakri jong ka PHC.