Nongpoh, Jylliew, 25: Uwei u rangbah ba don ka jingduna ha ka liang ka bor pyrkhat pyrdaiñ la lap mynta ka sngi ba u la pynkut noh ïa la ka jingim, da kaba phasi ha kawei ka khlaw jong ka shnong Tyrso ba la tip kum ka khlaw Lumshnong Tyrso.
Une u rangbah ba la duh noh ïa la ka jingim bad uba don kata ka jingduna ha ka liang ka bor pyrkaht pyrdaiñ la tip kryteng kum u Teibor Mangu, uba la don 29 snem ka rt ana ka shnong Tyrso Pdeng ba hap ha ka Mawlasnai Police Outpost ha Ri Bhoi.
Kumba la ioh lum jingtip, la ong ba une u rangbah u la jah na la ïing naduh hynnin ka janmiet bad hapdeng ka jingïawad da ki paidbah nongshong shnong la lap ïa ka met jong u ha katei ka khlaw kaba u la sdieng phasi ïa lade ha kawei ka tnad dieng hapoh katei ka khlaw.
La ong ruh ba ki Pulit ka Mawlasnai ki la ioh jingtip halor kane ka jingjia, ka dei hadien ba mynta ka sngi na ka liang u kñi jong utei u rangbah, u Bah Ojrin Mangu ryngkat ki rangbah ki la wan ban pyntip sha ki bor pulit ka Mawlasnai halor kane ka jingjia ba sngewsih.
La ong ruh ba na ka liang ki Pulit ka Mawlasnai hadien ba la ioh jingtip ki la pynlong ïa ka jingtohkit bad hadien ka jingtohkit la rah noh ïa ka met utei u rangbah sha Nongpoh Civil Hospital na ka bynta ka postmortem examination.
Halor kane ka jingjia, na ka liang kiba haïing ki la kyrpad ruh na ka bor district ban pynlait na ka postmortem examination, ha kaba kim don kano kano ka jingsuba ba shah pynïap ne shah leh sinew ha kiwei bad dei lyngba ka jingkyrpad kiba haïing la pynlait noh ïa ka postmortem examination lyngba u Executive Magistrqate u Bah A.L Myrthong,
Hadien ba la pynlait na ka postmortem examination la aiti noh ïa ka met jong u rangbah sha ki bahaing ban pyndep ïa ka jinglehniam kaba khatduh bad halor kane ka jingjia la dep register case.
