Kyntu jur ka seng ki nongñiah kali, EJHDA ïa u DC ba un tuklar lem halor ka jingsniew palat ka surok NH-6
'Ka jingsniew palat ka surok ha Khliehriat,kaba dei ka District Head Quarter ka long kaba i jah burom' EJHDA

Khliehriat risaw 11: Ka long shisha kaba i jah burom haduh katta katta haba phai sha ka jinglong jingman ka surok ha sor bah Khliehriat kaba dei ka Head Quarter jong ka District, namar ka surok ka la dap sa tang da ka um ktieh kaba lang ha ki thliew kiba don ha surok national highway, ha kaba ïadei bad kane ka seng jong ki nongñiah kali, ka East Jaiñtia Drivers Association mynta ka sngi ki la leit buh da ka jingthoh ha ophis u Deputy Commissioner ka East Jaiñtia Hills Distrct ha Khliehriat bad lyngba ka jingthoh ka seng ka kyntu jur ïa u Deputy Commissioner ba un sngewbha ban tuklar lem ha kaba ïadei bad ka jingsniew, jingjulor palat ka surok ha sor bah Khliehriat kaba dei ka District Head Quarter bad ha shi lyntre ka surok national highway-6 ha East Jaiñtia Hills District.
Katkum ka shithi ba la phah sha u Deputy Commissioner, ba la soi da u President EJHDA, u bah Lambor Dkhar bad u Secretary, u bah Gerald Phawa, ka seng ka pynpaw ba kumba long myntaka surok ha Khliehriat bad ha baroh ka wei ka district ka la sniew shaba palat haduh ba ym i long shuhtang ban ïaid ruh bad la i kumba ym don shuh mano mnao ruh khamtamka tnat sorkar ka ban shim khia lem halor kane ka jingeh ba ki paidbah ki mad namar ka jinglong jingman ka surok, wat ka tnat ba dei ban peit ïa ki surok ruh kam shym la shim khia wat tang ban maramot ruh.
Ka jinglong jingman ka surok, ym tang ba ka buh jingeh ha ka leit ka wan hynrei ka buh jingma ruh ïa ka jingim briew, ha ka jingshisha ki paidbah ki donkam ban don ka surok kaba bha bad kaba sngew shngaiñ ha ka leit ka wan, hynrei kumba long mynta ka surok khamtam ha Khliehriat ka dap da ki thliew ba heh- ba heh ba dap da ka um bad ka ktieh kaba lang kaba la i ruh kum ka surok khlaw bad ka bym i dei shuh ka surok national highway.
Na ka liang katei ka seng jong ki nongñiah kali ki ngeit ba ki bor synshar district lyngba u Deputy Commissioner un peit lem halor ka jingeh ba ki paidbah ki iakynduh ha ka leit ka wan.
Haba kren sha ki pathai khubor na ka liang u bah Lambor Dkhar bad u bah Gerald Phawa, ki la pynpaw ruh ka jingsngew khia halor ka jingtrei torti ka National Highway Authorityof India kaba la shu maramot tang ban dep rukom ïa ka surok da kaba shu tap tang da ka khyndew ïa ki thliew ki syar ha kaba kane ka la nang wahrah shuh shuh ka jingeh ïa ki paidbah ym tang ïa ki nongñiah kali hynrei wat ïa kito kiba ïaid da ka kjat ruh, namar ha ka por slap ki hap ban mad ïa ka jyrsieh kaba jur bad ha ka por ba rang ba rkhiang ki mad da ka pum pum khyndew kaba jur.
Namar ka jingsniew palat ka surok ka wanrah ruh ïa ka jingdheng kali Khah Khah ha sor Khliehriat bad buh jingeh ruh wat ïa ki pulit pynïaid kali ban tehlakam ïa kane ka jing dheng kali ha Khliehriat.
Na ka liang ka seng ka kwah ba na ka liang u MLA ka thaiñ uba dei u nongmih khmat bad na ka liang u Deputy Commissioner ba kin leit ban ïakynduh ïa ki heh jong ka NHAI ban kren shaphang ka jingeh jong ki paidbah jong ka District kiba ïakynduh jingeh haduh katta katta ha ka leit ka wan namar ka jinglong jingman ka surok ka la long shaba palat.