Shillong, Lber 23 : Ka Hynniewtrep National Liberation Council (HNLC) mynta ka Sngi U Blei, kala kynthoh jur halor ka rai ba dang shen jong ka Unlawful Activities (Prevention) Tribunal ban khang ïa u nongïasaid Aiñ ka Seng u Bah Fernando Shangpliang ba un ujor ïa ka show cause na ka bynta ka seng ka pyni sha ka pyrthei ïa ka jingthmu saiñ pyrthei ba rieh jong ka Sorkar India pyrshah ia ka seng bad ki buit synshar arsap ha Meghalaya.
Ha ka kyrwoh, u General Secretary-cum-Publicity Secretary ka HNLC Bah Sainkupar Nongtraw ula ong ba ka HNLC, ha ka rukom treikam kaba dei hok bad lynti jong ka synshar paidbah, kala pyrshang ban ïasaid ïa ka jingkheiñ beaiñ ïa ka seng kum ka “seng beaiñ”.
“Hynrei hapdeng ki jingbud ryntih ïa ki kyndon aiñ kata ka bor kaba kam ban bat ïa ka hok ka la long kum ka atiar ban pynsngap jar ïa ki jingïaleh jong ngi. Ka jingkyntait ka Tribunal ban pdiang ïa u nongïasaid aiñ jong ngi kam ïapher bad ka jingleh khnang ban kyntait ïa ka sur ba dei hok jong ki Hynniewtrep ha kane ka riti synshar paidbah. Kam don satia ka jingleh hok ïa ngi katba ngi dang hap hapoh ka lama ka ri India” kala ong.
“Ki jingleh jong ka Tribunal ka dei ka jingpynkheiñ bakla ïa ka lynti jong ka Aiñ kumba la pruid dak ha ka rukom pynïaid ïa ka bishar khadar hapoh ka ri India. Ka ïuhroit ïa ka nongrim ba la pdiang da ka pyrthei halor ka jingbishar kaba hok, ka pynkylla kamkai ïa ka jingbishar ba leh hok kaba ïasyriem kum ka Kangaroo Court ha kaba ïa ka hukum la lah ban batai lypa. Kum kane ka jingleh ka pynpaw pyrthei ba ka Tribunal kam dei kaei kaei ruh hynrei ka atiar saiñ pyrthei bala pyndonkam ban pynduhjait ïa kino kino ki jingïaleh pyrshah ïa ka jingsynshar ka India ha bri Hynniewtrep” ong u Bah Nongtraw.
“Haba ïathuh ba ka sorkar pdeng bad ka sorkar jylla ki la dep ai ïa ki affidavit jongki hynrei haba ka seng HNLC ka pyrshang daka lynti ka aiñ la pakhang lynti noh ïa ka. Kane ka jingleh ka pynpaw ïa ka jinglong arsap ka sorkar pdeng bad sorkar jylla kiba ïalap ïa ka synshar paidbah hynrei kiba synshar pat kumba synshar ki dohlieh. Kane ka pynpaw sa shisien ïa ka jigthmu ka sorkar ban khniot beaiñ ïa ki paid Hynniewtrep ban ïakaba ailad ba kin ïasaid da ka lynti jongka aiñ”.
“Hynrei wat hapdeng kine ki jingpyrshang ban khanglad ka seng HNLC kan ïeng skhem ha ka nongrim ban ïakhun ïa ki jingkynnoh ba khlem nongrim ïa ka. Ka Tribunal ka ban shong bishar ha Guwahati ha ka 9 tarik Iaiong kan long ka jingshong bishar ka ban thad madan ïa ki jingthok bad jingkynnoh ba khlem nongrim jongka srkar pdeng bad ki bor jongka ïa ka seng. Ka jingïakhun kan ym kut satia, ngin ym sngap jar, ka jingïaleh jong ki paid Hynniewtrep ban ïoh ïa ka jinglaitluid bad jingsynshar lade kan ïai bteng ban yn ym don ba lah ban khniot ne khang lad da no da no ruh.Ngi kyrpad ïa ki paid Hynniewtrep ban bishar bniah ïa kine ki jingleh thok leh shukor bad jingpyndonkam da ki bor ka aiñ ban khniot ïa ki hok jong ngi. Ki bor ka sorkar pdeng kin ïaleh ban pynduh ïa ka hok jong ngi hynrei ka jingïa leh jong ngi kan ym kut bad yn ym don ba lah ban pynpra ïa ngi. ngin ym pyndem hynrei ngin ïeng ïaleh ha ka nongrim bad ka lynti jong ngi” pynkut ka kyrwoh na ka seng.
