Shillong, Nohprah, 23: U MDC jong ka United Democratic Party (UDP) na Nongkrem u Bah Lambor Malngiang u la kyntait war halor ka jingshah kynnoh ba u leh pyrshah ïa ka party da kaba leit ai jingkyrshan ïa ka Executive Committee ba la ïalam da ka National People’s Party ha Khasi Hills Autonomous District Council (KHADC).
“Kumno kan long kaba nga leh pyrshah haba ka UDP bad ka NPP ki ïatreilang hapoh ka Jylla? Jin lada ka UDP ka shng ha ka Liang Pyrshah (ha Ingdorbar Thawaiñ) nga sngewthuh bha ïa kata,” la ong u Bah Malngiang ha ka jingïakren bad ki lad pathai khubor.
Kane ka jingkren jong u, ka long hadien ba ka Parliamentary Party jong ka Party ha ka jingïalang ba kyrkieh ba la pynïaid da u Nongïalam ka Liang Pyrshah u Bah Titosstarwell Chyne ka la phah da ka jingthoh sha u President ka UDP u Bah Metbah Lyngdoh ban dawa ba ka party ka dei ban pynshitom ïa u Bah Malngiang.
Haba kynthoh halor kane, u Bah Malngiang u la ong, “ngam tip la ka dei ka jingdawa jong baroh ki MDC lane ka dei tang ka jingdawa jong u Nongïalam ka Liang Pyrshah marwei.”
“Hangno ka don ka jingktah (ban kyrshan ïa ka EC ba la ïalam da ka NPP ha KHADC) haba ka UDP bad ka NPP ki ïatreilang hapoh ka Sorkar Jylla. Nga sngewkmen ïa ka jingtreikam jong kane ka EC ba mynta namarba ka sngap ïa ki jingangnud jong ngi,” u la bynrap.
Haba kylli, u Bah Malngiang, “haoid, nga dang ïakren bad u President ka UDP. Ha ka jingshisha nga ladep ïathuh ïa u ïa ka rai ba nga la shim ban kyrshan (ïa ka EC) bad u la ong ba ka biang kam don eiei.”
U Bah Malngiang u la pynpaw ruh ba um don kano kano ruh ka jingthmu ban pynïasoh bad kano kano ka party.
“Namarkata, kano kano ka rai ba ki (party) ki shim, ngan sa peit bad ngan sa rai. Ïa mynta, ngan ap shwa,” u la ong.
Halor ka jingkynnoh ba u ai jingkyrshan ïa ka NPP ha ka por ba la pynkhyllem ïa ka EC ba la ïalam da ka UDP, u Bah Malngiang u la kyntait war ïa kane ka jingkynnoh bad ong, “kam don eiei kaba kum kata. Ha ka jingshisha, nga dei uba nyngkong eh ban soi ïa ka shithi na ka bynta jong u (Titosstarwell Chyne) kum u Nongïalam ka Liang Pyrshah.”
