Kyntait ki bor pynïaid District ban ai jingbit ïa ka jingthmu shong kyllaiñ mungor ka KSU

Shillong, Nailar 23: Ka bor district ka East Khasi Hills kala kyntait ban ai jingbit ïa ka seng Khasi Students’ Union (KSU) ba kan pynlong ïa ka jingiashong kyllain mungor lashai ka sngi ka 24 tarik Nailar ha u mot jong u Woh Kiang Nangbah, haba kdew ïa ka jingsynjor ka shongsuk shongsain bad ka jingpynkhein ïa ki kyndon ha ka rally thuk thuk ba 19 tarik Nailar.
Ha ka shithi sha u Assistant General Secretary ka KSU samla Pynshai Rani bala phah ha ka 22 tarik Nailar, u Deputy Commissoner Abhilash Baranwal ula ong “….kane ka long kum ka jingpyntip sha phi ba haba peit ïa ka jingsynjor ka shongsuk shongsain hapoh ka Sor bad haba khmih bniah ba ïa ka kyndon bala buh ha ka jingbit ba hashwa bala ai sha ka Seng jong phi ban pynlong ïa ka rally thuk thuk ha ka 19 tarik Nailur la pynkhein, ka jingbit ban pynlong ïa ka shong kyllain mungor ha ka 24 tarik Nailar, 2026 ka long ka bym lah ban ai”.
Ka shithi kala pynpaw ruh ba ka bor district kala pynjari ïa ka kyndon 163 jong ka Bharatiya Nagarik Suraksha Sanhita (BNSS) ha ki jaka kiba hap hapoh ka Sadar Sector.
Haba kylli halor ka jingpynkhreh lada ka KSU ka pyniaid beit shakhmat ïa ka jingiakhih, u Baranwal ha ka sngi U Blei ula ong “Ka jingpynkhreh ka long kumjuh ïa kaei kaba la leh ha ka 21 tark Nailar.Ngin pynthikna, naba ka Dorbar jong ka Iingdorbar Thaw Ain ruh kan sdang bad ka Iingkashari High Court ka dang shong bishar ïa kane ka kam, ngi la kut jingmut ban pynthikna ba kam dei ban don ka jingpynthut ïa ka shongsuk shongsain hapoh ka Sor.