Shillong, Naiwieng, 28: Ka Khasi Students’ Union (KSU) ha ka sngi Baar ka la leit ban ai jingiarap ia ki samla ki ban mih khmat sha ka National Youth Champoin League kaba lai sngi, kata naduh ka 8 tarik, haduh ka 10 tarik Nohphrah 2023 ba la pynlong da ka Pro MMA League ha Priyadarshini Youth Complex, Malund West, Mumbai.
Ka Seng hapoh ka jingialam jong u Sport Secretary u samla Eric Nongkynrih ka la noh synñiang sha ki saw ngut ki samla kiba mihkhmat lyngba ka Shlem School of Martial Arts kaba don hapoh Mawlai Iewrynghep.
U Samla Eric haba ai jingkren u la kyntu kynpham bad ia ki samla ki ban mihkhmat ba kin trei shitom ban ioh ia u soh ka jingjop ha ka jingiakhun ka jong ki bad kumjuh ban iai kyntiew lem ia ki para samla namar ka jingialehkai sports ka dei kawei ka lad ka lynti ka ban pynjngai ia ki samla na ki jingdih pynbuaid kum u drok uba la kynrei bha hapoh kane ka jylla.
U la pynkynmaw ruh ia ki sienjam kiba ka seng ka la shim ha kaba ka la plie ia ka Maitshaphrang MMA and Fitness Team ha ka shnong Nongthymmai kum kawei na ki shlem ban ai jinghikai ia ki samla ha ka liang ka jingkilan met bad kumjuh ban kyntiew ia ki samla ha ki kam ialehkai sports.
