Shillong, Naitung 14: U MDC ka BJP na Tura u Bernard N Marak ha ka shithi ba u la phah sha u Myntri Rangbah ka jylla u Conrad Sangma u la ong ba ka la don ka jingpynkheiñ ïa ki kyndon jong ka khyrnit kaba 6 jong ka riti synshar ka ri da u Deputy Commissioner ka WGHD.
Ha ka shithi u la ong ba u la dap da ka jingsngewkhia ban ïohsngew ba u Jagdish Chelani, u Deputy Commissioner jong ka West Garo Hills u la bthah ïa ki heh ophisar ba kin leit rung hapoh ka Leper Colony locality khlem ka jingpyntip ïa ki nongshong shnong, u Nokma, bad ïa u MDC ka thaiñ bad ka Council ka la kam ba ka dei ka jaka jong ka sorkar ha kaba kane ka la pynmih ïa ka jingkulmar bad ka jingsngewtieng hapdeng ki nongshong shnong.
U la ong ba ka Garo Hills kaba hab hapoh ka Sixth Scheduled area ha kaba ki jaka la long trai da ka kur (clan) bad ka hok jong ki riewlum ba la ïada na ka jingshah thombor ha ki bar jylla hynrei u Deputy Commissioner uba mihkhmat ïa ka jylla u la pynmih ïa ka hukum ban kam ïa katei ka jaka ha kaba kane ka la long kaba beaiñ kaba khlem da la ai ruh ïa ka bai lutksan.
“Shah ïa nga ban pyntip ba kham hashwa u Deputy Commissioner u la pynthikna ba ka Leper Colony kam pat dei ka jaka jong ka GAD (Copy enclosed), hynrei u Deputy Commissioner u la kam lyngba ki heh ophisar ba ka Leper Colony kadei ka jaka sorkar. Nga kwah ruh ban pyntip ba ha ka Monitoring Committee meeting ha Delhi la ong ba baroh ki Deputy Commissioner bad Superintendent of Police kiba shah thung ha Garo Hills ki dei ban tip ïa ka aiñ khyndew ne ka “Law of the Land” bad ban tip ruh ïa ki aiñ, ki kyntien bad ki kolshor jong ki Garo. Bad kane ka jingprong jubor da u Deputy Commissioner kan lah ban ïalam sha ka kam kaba beaiñ kaba ym lah satia ban pdiang,” ong u Bernard.
Ha ka shithi u la kyntu ïa u Myntri Rangbah ban pyntip sha baroh ki khlieh jong ki District ïa ka bynta treikam jong ki DC, SP ha kaba ïadei bad ki jaka kiba hab hapoh ka Sixth Scheduled area bad ban pyntip ba baroh ki distrik ba la thaw thymmai ki don ïa ka kyrteng jong ka Hills. Kumta ka long kaba kongsan ba na ka liang ki heh ophisar kidei ban tip halor kane ka bynta lyngba ka jingshim khia jong u Myntri Rangbah ka jylla.
