Jowai, Naitung 14: Ka Khasi Students’ Union (KSU) Barato Unit ha ka sngi Saitjaiñ ka leit ïa kynduh ïa u Doctor Incharge jong ka Barato Primary Health Center (PHC) hadien ka jingïoh pdiang ïa ki jingujor na ki paidbah ka thaiñ ba u doktor jong ka PHC u juh kren tohmet ïa ki paidbah kiba wan wad dawai bad wad jingsumar na ka PHC.
Ka seng ka la ïakren bad une u doctor ba nangne sha khmat ym dei shuh ban dang ïai jia namarba ma u kum u doktor ba la nang lah stad u dei ban sngewthuh ïa ki paidbah bad ka seng ka la kyntu ruh ba lada ki paidbah kim burom markylliang u dei ban ai jingtip sha ki nongïalam jong ka shnong ban peit ïa kane.
Hadien ka jingïakren, ka seng ka la jurip ïa ka jinglong long jingman jong kane ka jaka ai jingsumar bad la lap ïa shibun ki jingduna jong kane ka PHC naduh ka umbam umdih, ki nongtrei, ki kamra ba ban pyndonkam bad ka surok.
Ka seng ka kyntu ïa ki bor ba dei peit ban pynbiang ïa ki jingduna baroh bad ka seng kam kwah nangne shakhmat ban ïoh sngew ne lap ïa kum kine namar ym lah satia ban sngap bad ban peit ïaka jingud jingnam ki para doh para snam kiba shong ba sah ha kane ka thaiñ.
Ka Seng ka la kyntu ïa ka tnat ka Koit ka Khiah jong ka ka Sorkar Jylla ba ïa kane Primary Health Center (PHC) la dei ban kyntiew kyrdan noh sha ka Community Health Center (CHC) namarba ka jingbun briew ka la biang palat namar tang ha ka kyrdan ka PHC kam lah shuh ban ai ïa ka jingshakri ba paka ïa ki paidbah babun kane thaiñ.
