Shillong, Risaw 15: Ki riew rangbah bad ki nongshong shnong ka shnong Nongspung hapoh ka jingïalam u samla Aiales Marwein bad u Bah Wanjerstar Marweiñ ki la pynpaw ka jingpyrshah kaba jur ïa ka jingleh donbor jong u Acting Syiem u Paiem Kyntiewborlang Syiemlieh u ba u la weng jubor ïa u acting sordar ka shnong Nongspung u Bah Lodral Nongsiej da kaba kynnoh ba um dei u nongshong shnong bapura ka Nongspung kaba u la leh ha kine ki sngi.
Ha kaba iadei bad kane kitei ki riew rangbah kiba la kam ba ki la wan na ka sur jong ki nongshong shnong kiba la ïasoi lang ban pyrshah ïa kane ka jingleh jong u Acting Syiem, bad haba ïakren bad ki lad pathai khubor u Bah Aiales Marweiñ u la ong, ba ka jingwengkam jubor u acting Syiem ïa u acting sordar shnong Nongspung ka la long kaba khlem don kino kino ki daw kiba biang.
Na ka kitei ki riew rangbah ki la pynpaw ruh ba ha ka jingshisha ban wengkam ïano ïano hap ban don ki nongujor hadien kata hap ban pyntip sha ka Hima bad khatduh sa khot da ka jingïalang hynrei utei u acting Syiem la kynnoh ba u la wengkam jubor ïa u acting sordar shnong Nongspung, uba ki paidbah ki shaniah bad ki ieid bad ïatreilang bad ha ka jinglong acting sordar jong une u Rangbah kam ju don kano kano la jinghuri hura ha shnong ha thaw hynrei tang ka shongsuk shongsaiñ bad ka jingïaid beit ïaid ryngtih ki kam ki jam hapoh ka shnong ka thaw.
Ha kaba ïadei bad kane ka jingwengkam jubor ïa u acting sordar shnong Nongspung, na ka liang u Bah Aiales Marweiñ u la kynnoh ba u tei u acting Syiem u la thung acting sordar pynban da u briew u bym dei napoh ka shnong Nongspung, ha kaba une u acting sordar ba mynta u dei u ba shong basah ha ka shnong Laitlarem. Kumjuh ruh u la buh jingkylli ba kumno lah ban thung acting sordar da u wei u briew uba shabar jong u pud u sam ka shnong Nongspung ha kane kam ju don ka rule ka aiñ ka ban shah ban leh ïa kane ka kam.
U Bah Marweiñ u la ong ba na ka liang ki nongshong shnong ka Nongspung baroh kawei ki la pynpaw ka jingsngewsih ba hadien ba wan biang u Bah Kyntiewborlang Syiemlieh kum u Acting Syiem ula pynkulmar lut ia ki kam synshar hapoh ka shnong Nongspung, ha kaba u la leh katba u mon ïa kano kano ka kam kaba u sngewbit.
Shuh shuh u la ong, ba ki nongshong shnong ki dap da ka jingsngewkhia na ka bynta ka shnong namar naduh u snem 2019 la shu thung beit tang da ki acting syiem, hynrei kaba sngewsih mynta u acting syiem ula weng jubor ïa u acting sordar ka shnong Nongspung.
Haba ïathuh ba haduh mynta naduh ka snem 2019 ki la don haduh 5 ngut ki acting sordar ba la thung hapoh ka shnong Nongspung. Kumta ki khun ki hajar ka shnong Nongspung baroh kawei ka la kyrpad ïa ka District Council ba kan pynbeit noh ban jied noh ïa u Syiem ba pura bad ki la kyrpad ba ïa kane ka kam ba shah wengkam jubor u acting sordar ba ka council kadei leh noh kham kloi, ban ïoh noh ïa u sordar ba pura jong ka shnong Nongspung khnang ba ka kam synshar khaddar kan long biang kaba ïaid beit ïaid ryntih bad kumjuh ruh ba kan don biang ka shongsuk shongsaiñ hapoh ka shnong baroh kawei bad kumjuh ruh hapoh ka Hima Nongspung.
