Shillong, Nailar 26 : Ka All India Trinamool Congress (AITC) kaba don haka Liang Pyrshah lyngba u MLA ka Rangsakona u Zenith Sangma mynta ka sngi ka la kynnoh ba ka sorkar MDA ka la pynkylla kyrteng lut ïa ki skhim ba la wanrah da ka sorkar MUA hapoh ka jingïalam u Dr Mukul Sangma mynshwa.
Haba kren ha ka jingïalang pynrung dkhot sha ka TMC ha Ampati, u Zenith u la ong “ Ka sorkar MDA ka la pynduh lut ïa ki skhim ba la wanrah da ka sorkar MUA hynrei mynta ïaki juh ki skhim ki la jer da kiwei pat ki kyrteng. Nalor kata u Myntri Rangbah u Conrad K Sangma ula kob ba la wanrah ïa ka roi ka par ha ka jylla lyngba ka skhim PMGSY, hato u la klet ba kane ka skhim ka dei jongka sorkar pdeng?”.
U la ong shuh shuh “Haka election ba la dep ka Congress ka la jop bun da kaba jop 21 seat bad ka NPP tang 19 Seat hynrei wat la katta ruh ka NPP ka la thaw ïa ka sorkar da kaba ïatrei lang bad kiwei ki party. Mynta hadien ba kila dep thaw ïa ka sorkar ula kynnoh ba ki la klet ïa ka roi ka par jongka jylla bad lapmiet sa tang haka bamsap bam phong bad kim don ka jingthrang ban shakri ïaki paidbah”.
Halor ka hospital ban kha khyllung, ka Dikkanchi D Shira ka la ther da kaba ong “ Bun ki longkmie kiba pun khun ki duh ei ïa ki khun ba ki pun ne wat ïa lade ruh. Hynrei haba nga kwah ban thaw ïa ka hospital la wan pynthut ka sorkar MDA”.
Ka la kren bynniaw ruh halor kajinglong jingman ki surok bad ki lynti syngkieng. “ Bun ki mynsiem briew ki la duh ei ïa la ka jingim namar ka jingsniew ka surok Dalu. U Dr Mukul Sangma u trei na ka bynta ki paid nongkyndong namar ula san la rangbah ha nongkyndong bad kumta lada pynjop biang ïa u ban long myntri rangbah un wanrah ka jingroi jingpar ïa ka jylla” Ong ka Dikkanchi.
Ka AITC ka la kynnoh ruh ba kane ka sorkar ka bunkam tang kumno ban neh ha ka bor katba ka klet ban peit ïa ki jingeh ki paidbah. Lada phai sha ka pule puthi ruh ka la nang hiar, ki surok ki la nang sniew, kumta ka khot bad ïawer ïa ki paidbah ban wanrah ka jingkylla ha ka jylla.
