Kynnoh ka RBYF ba ai wai ka tnad Forest ban pom dieng na khlaw Shnong Mawkynrong sha ka Dhar Company

Nongpoh, Naiwieng 16: Ka Ri-Bhoi Youth Federation, Mawhati Circle kala pynpaw ka jingsngew lyngngoh bad jingsngewsih kaba khraw hadien ba kala lap ba ka tnad Forest kala ai wai ïa kawei ka khlaw kaba don haka shnong Mawkynrong haka thaiñ Mawhati sha ka Dhar Kompani ban pom dieng ha kaba naka liang katei ka kompani kala pom palat 8 hajar tynrai eiei.
Haba phah ïaka kyrwoh naka liang u Bah Reynold Dkhar, President ka RBYF Mawhati Circle u la ong ba kum ka seng ka dap da ka jingsngewsih ba kumno ka tnad Forest kaba dei ka nongïada ïaka jingshah pynjot ki khlaw ki btap, hynrei ka dei pynban ka nongpynjot bad pynsniewdur ïaka mei mariang ha kaba la kynnoh ba dei ka tnad Forest kaba la ai wai ïa katei ka khlaw sha u briew shimet ban pom dieng ha kaba ki dieng ha katei ka khlaw kam duna ïaka 15 hajar tynrai.
U la ong ruh ba kum ka seng ka dap da ka jingsngewkhia kaba khraw namar katei ka jingpom dieng na katei ka khlaw kan ktah ruh wat ïaki tyllong umbam umdih kiba don ha ranap jong uta u lum ba ki pom dieng, ha kaba naka liang ka seng kala kynnoh ruh ba ka tnad Forest kala pynbiej ruh wat ïaki shnong kiba don ha katei ka thaiñ.
Naka liang ka seng kala pan jingshai ruh naka tnad Forest ba kumno ki lah ban aiwai ban pom bad pynjot ïaka khlaw sha u riew shimet ha kaba ka jingpom dieng ha katei ka khlaw kala long kaba shyrkhei bad naka liang ka seng kan sa pynlong ruh ka jingwad bñiah halor katei ka jingleh jong ka tnad Forest kaba la ailad ïa u riew shimet ban pom dieng na katei ka khlaw.
Ka seng RBYF kala pan por ruh 2 sngi naka tnad Forest ba ka dei ban pynshai halor ka jingailad ban pom dieng bad pynjot mariang ha katei ka khlaw da u riew shimet bad lada kam lah ban ai jingshai naka liang ka seng kin sa leit ban pynsangeh noh mardor bad ban ujor sha ka iing bishar halor ka jingpynjot mariang da ka tnad kaba dei ban sumar bad ïada ïaka.