Kynnoh ka KSU ba ïaid lait ka Directorate of Forensic Science na ka Services Rules 2021

Shillong, Nailur, 24: Ka Employment and Monitoring Cell jong ka Khasi Students’ Union (KSU) ha ka sngi Baar ka la aiti da ka jingujor hakhmat ka Director jong ka Directorate of Forensic Science ka Kong N. Nongkynrih halor ka jingkhot aplikeshon lyngba ka Meghalaya Public Service Commission (MPSC) kaba la pynbna paidbah ha ka 19 tarik Nailur 2024 halor ka jinglait ki post Scientific Officer, Senior Scientific Assistant bad Scientific Assistant ha ka Mobile Forensic Crime Scene Unit
Ha u kyrwoh ba la phah da u Information Secretary ka KSU samla Pynshaiborlang Ranisha sha ki lad pathai khubor ka sneg ka la kynnoh ba ka Directorate ka lah ïaid lait na ka Schedule II jong ka Rule 8 ka Meghalaya Forensic Laboratory Service Rules 2021 da kaba buh kyndon ba ki nongaplai ki dei ban long kiba la pyndep ïa ka M.Sc ha ka Forensic Science.
“Katkum ka Rule, kino kino ki nongthep kam kiba la pyndep ïa ka jingpule M.Sc Science Stream ki lah ban aplai ïa kine ki posts, hynrei ka Directorate ka pynkylla ïa kane khlem da don kano kano ka kyndon ba biang,” la ong ka Seng.
“Kane ka jingleh na ka liang ka Directorate ka la wanrah ïa ka jingkhanglad ha ka hok jong ki samla kiba la pas ïa ka kyrdan pule M.Sc na kiwei pat ki Subjects katba ka Services Rule bad kiwei ki Directorate jong ki Jylla bapher bapher ki shah ïa ki ban aplai,” la ong shuh shuh ka Seng.
“Ha kane ka jingïakren, na ka liang jong ka Director ka lah ïathuh ba kane ka jingpynkylla ka dei lyngba ka jingbthah ktien tang da u Secretary jong ka Home Department ka Sorkar Jylla kaba la pynlyngngoh ïa ka Seng ba kumno kat ka Directorate ka dang hap ban pdiang ïa ka jingbthah ktien na ki bor ba nalor ha kaba ïadei bad kano kano ka jingpynkylla thymmai ïa ka rukom treikam,” la buh jingkylli ka KSU.
“Ka Seng kam lah ban pdiang daleilei ïa kane ka jingleh da ka Directorate ban ïaid lait na ki kyndon thungkam kiba la don lypa, kaba long kum ka jingkhanglad ïa kiwei ki samla wadkam wadjam bad kumjuh kane ka jingleh ka pyni ba ka don ka jingpyrshang ban pynhun ïa ki heh Sorkar ha ka jingpynrungkam da kaba ïaid lait ïa ka Services Rule,” la kynthoh ka Seng.