Ïasoi soskular ka Sorkar bad ka Bill & Melinda Gates Foundation ban kyntiew ïa ka koit ka khiah ha ka jylla

By Mawphor News Desk On Sep 25, 2024

Shillong, Nailur 24: Ka Sorkar jylla bad ka Bill & Melinda Gates Foundation (BMGF) ka la shim ïa ka rai ban ïasoi soskular ban ïatreilang na ka bynta ban pynbha ïa ha kaba ïadei bad ka koit ka khiah, ka bam kaba tei met, ka rep ka riang ha ka jylla, khamtam ruh ka kam sumar ïa ki longkmie, ki khyllung, ka rukom kaba ïadei bad ki longïing longsem bad kiwei kiwei. Lah ban ong ba ka Meghalaya ka dei kawei na ki jylla kaba lai jong ka ri India, hadien ka jylla Uttar Pradesh & Bihar, ha kaba ka Gates Foundation ka long ka paralok ha kaba ïadei bad kane ka bynta.
Ïa kane ka MoU la soi ha ka jingdonlang u Myntri Rangbah ka jylla u Conrad K Sangma bad ka Myntri ka tnat ka Koit ka Khiah bad ka kam rep ka riang ka kong M Ampareen Lyngdoh. Ha kane ka sngi la donlang u M. Hari Menon, Director jong ka India Country Office kaba ha Gates Foundation, bad u Sampath Kumar, Principal Secretary ka sorkar jylla uba khmih ïa ka tnat ka koit ka khiah nalor kiwei kiwei.
Kane ka jingïasoi soskular ka long ruh kum shi bynta ban kyntiew ïa ka koit ka khiah ha ka jylla Meghalaya, kaba long ruh kum ka thong kaba la buh da ka United Nations Sustainable Development, kaba la buh ïa ka thong hapoh u snem 2030. Kane ka MoU kan neh kumba 4 snem kaba dei na ka bynta ban kyntiew ïa ka koit ka khiah.
Lyngba ka MoU, ka BMGF kan ai ruh ka jingïarap ha kaba ïadei bad ka pisa bad kiwei pat ki jingkyrshan ha kiba bun ki jaka, kaba kynthup ruh ha ki rukom sumar kum ka anaemia, neonatal, immunisation, ki kam sumar ïa ki khynnah ka bam kaba tei met bad kiwei kiba ïadei bad ka koit ka khiah.
Haba kren ha kane ka jingïasoi soskular na ka liang u Myntri Rangbah ka jylla u Conrad K. Sangma u la banjur ïa ka jingdonkam jong ka jingïatreilang ha kaba ïadei bad kane ka bynta kaba kongsan bad ong, “Ngi kmen ban ïoh ka jingïatreilang bad ka Gates Foundation. Ngi donkam ban don ki briew kiba don ka jingmut jingpyrkhat kaba biang ha kaba ïadei bad kane ka kam ban kyntiew ïa ka koit ka khiah ne ha ki kam ri jingri ka ban long ka jingmyntoi na ka bynta ki nongshong shnong.”
Katba na ka liang ka Dr. Mazel Ampareen Lyngdoh, ka la pynpaw ïa ka jingkmen ban lah ban pynurlong ïa kane ka jingthmu kaba la khmih lah slem bad ka pynpaw ka jingkyrmen ba kan long ka jingjop na ka bynta ka jylla bad kane ka thaiñ shatei lammihngi.
Ha kane ka sngi la ïoh ruh ka jingkren na u M. Hari Menon, Director – India Country Office & South & Southeast Asia Director, Bill & Melinda Gates Foundation, u Sampath Kumar, Principal Secretary & Development Commissioner, ka sorkar jylla.
La ong ba ka Meghalaya State Health Society kan shim ka jingkitkhlieh na ka bynta ban don ka jingïatreilang halor kane ka bynta khamtam kaba ïadei bad ka jingbei pisa da ka BMGF.