Kynnoh ka HNLC ba pyndonkam bakla ka Sorkar ïa ki dkhot ba la pyndem wait

Shillong, K’ Lyngkot 21: Ka seng Hynñiewtrep National Liberation Council (HNLC) ha ka sngi ba ar ka la kynnoh ïa ka sorkar jylla ba ka la pyndonkam ïa kiba la wan pyndem wait kum ki atiar pyrshah ïa kane seng lehnoh.
Ha ka jingkynthoh ba la pynmih ha kane ka sngi na ka liang u general secretary-cum-publicity secretary ka HNLC u Bah Sainkupar Nongtraw u la ong ba ka jingshim kam jong ka sorkar bad kumjuh ruh hadien jong ka jingïakren ïasuk bad ka HNLC ka la wanrah ïa ka jingshaniah kaba ym lah satia ban pdiang.
“Ka jingkhot hajir ïa ki nongïalam jong ngi ha kaba ïadei bad ka jingïakren ïasuk kam dei satia ka sienjam sha ka jingsuk hynrei ka dei ka kam kaba la pynbor, ha kaba kane la sakhi lyngba ka jingleh beiñ ym ka jingïakren. Kane jingthombor ïa ki dkhot jong ngi ka dei ka jingpynpharia ïa ki dkhot ka seng,” u la ong.
“Ka sorkar jylla khamtam ka tnat pulit ka la pyndonkam ïa kine ki dkhot kiba la wan pyndem ne ki surrendered HNLC kum ki atiar jong ka HNLC. Kine ki riew shimet wat la ki la leh ïa kiba bun ki kam bym man kim shym la shah pynngat ha kino kino ki kam mukotduma bad ki dang ïaid lait luid,” ong u Bah Nongtraw.
Na ka liang jong u, u la kynnoh da kaba ong, “Dangshen ka Ophis Additional Director General of Police, Special Branch, ka la pynmih ïa ka jingpynbna ba kan khot ïa ki bahaïing jong ki lehnoh HNLC, bad ba kin pdiang ïa kane ka shithi. Ha ka shithi la thoh SECRET- OFFICE OF THE ADDITIONAL DIRECTOR GENERAL OF POLICE, SPECIAL BRANCH, ha kaba kane ka long kaba don ka jingkheiñ kaba don pud.”
Ha kane ka jingjia bad kaba la khot da ka “secret” communication ka la kdew halor ka jinglong kaba arsap halor ki kam jong ka kaba pyni ïa ka jinglong kaba ban beiñ ïa ki dkhot jong ka seng.
“Ka HNLC ka la ong ba kito kiba la iehnoh ïa ka seng bad kiba la pynïasoh bad ka sorkar khlem da ïakhun pyrshah ïa ka HNLC la pyrkhat ba ki dei kiba la iehnoh bad kiba la wan ban pyndem wait. Hynrei ha kawei pat ka liang kito kiba la iehnoh ïa ka seng bad kiba donkti ban ïakhun pyrshah ïa ka HNLC la kheiñ ba kidei kiba la iehnoh ïa ka seng,” bynrap u Bah Nongtraw.
Haba kyntu ïa ki paidbah ba kin kheiñ ïa kane ka jingshah shet kylla bad ba kin ïeng tylli, u nongïalam ka HNLC u la ong, “Ka jingsuk kan wan na ka tyllong na ka jingïakren haba ïadei bad ki jingjia ne jingïakhun ym da kaba pynsngap jar ïa kito kiba dawa ïa ka jingbishar kaba hok bad ka jinglait luid na ka bynta ka bri u Hynñiewtrep.