Kynnoh ba thombor ki runar ïa ki riewngeit Hindu katba dang leh niam ha Mahadev Khola
![](https://mawphor.com/wp-content/uploads/2022/07/mawphor-1.jpg)
Shillong, Naitung 24 : La kynnoh ba ka kynhun ki riew runar, ha ka sngi Nyngkong, ka la leit thombor ïa ka jaka leh niam ki Hindu ba la tip kum ka Shiv Temple kaba don ha Mahadev Khola bad shoh ïa ki riewngeit katba ki dang wan leh niam.
Kane ka jingjia ka la jia ha ka por 12 baje eiei bad ki Pulit mynta ki dang tohkit ïa kane ka jingjia bad dang shong bishar ïa ki video ba la ring lyngba ki CCTV ban lah pynithuh ïa kine ki runar.
Namar ka jinglehniam Sawan jong ka sngi Nyngkong kaba lai, ki la don bun ki riewngeit kiba wan sha ka Temple hynrei kynsan kynsan, ki riew runar ki la wan rung ha kane ka Temple bad shu shoh naphang ïa ki riew ngeit kynthup ïa ki nong shongdukan hajan kane ka jaka mane blei.
La kynnoh ruh ba kine ki runar ki la knieh bad shoh ïa ki riew ngeit kynthei kiba wan ban tyrwa um sha u Blei ha kane ka temple ha kaba bun ngut ki la mynsaw.
La ong ba hadien kane ka kam thombor, kine ki runar kila phet krad na kane ka jaka bad ki bor pynïaid kane ka jaka mane Blei ki la pyntip mar mar sha ki Pulit ba kin wan tohkit.
Ki bor pynïaid ka Temple ki la pyntip ruh ba kum kine ki kam thombor ha kane ka jaka mane Blei ka dei kaba la jia la bun sien.
Ki Pulit ki la register case halor kane ka jingjia bad ka jingtohkit ka la ïaid shakhmat ban ithuh ïa ki briew ba donkti bad ban leit kem ruh ïa ki.
Katba u Superintendent of Police u pyntip ba nyngkong kane ka jingjia ka la sdang na uwei u briew uba la wan sha Mahadevkhola bad pan ïa ka jingdih Amul Cool na kawei ka dukan.
Une u briew ula pan ïa kane ka jingdih da kaba ong ba un sa siew hadien hynrei namar ka jingkyntait ka trai dukan, une u briew ula kawang da u snepkor ïa ka trai ha kaba la mih u khun ban tuklar bad poi sha ka jingïashoh.
U ïathuh ba hadien shiteng kynta, une u briew ula wan biang bad saw ngut kiwei pat ki briew ban thombor ïa kane ka kynthei bad ïa u Khun bad ki la tuh ruh ïa ka pisa na ka dukan jong ka shuwa ba kin phet krad.
Ki Pulit ka Jhalupara haddien ba ki la ïoh jingtip ïa kane, ki la leit mareh wut wut ban pynlong ïa ka jingtohkit. Ki Pulit ki la register case ia kane ka jingjia ha Lumdiengjri Police Station.