Kynmaw burom kiba ha ïing u Archibishop Dominic Jala ïa ka lyngkhuh sngi khlad ba lai

Shillong, Risaw 10: Ki ba ha ïing hasem u Lyngdohsad Dominic Jala uba dei u Archbishop ka Shillong Archdiocese uba la khlad noh ha ka 10 tarik Risaw 2019 ha ka sngi Nyngkong ki la leit ban buh syntiew ha ka jaka ba la tep ïa u ha syndah ka Ïingmanebah ka Maria ka Nongïarap ki Khristan, Shillong.
Haba kren bad ki lad pathai khubor ka Kong Celina Jala Kharbhih kaba dei ka para trai jong u Lyngdohsad Dominic Jala ka la ong ba u u Archbishop Dominic u dei u briew ba shisyrtap ki jinglong kyrpang kiba u don kiba kum kiba ïing ka sem kat haduh mynta ki dang kynmaw ieid kyndiang ïa ki sngi mynba u dang don ha sla pyrthei.
“U long u hymmen, u long ruh u para, u long u kñi, u long ruh kpa mynsiem uba da kynsai shisha” ong ka para jong u.
Haba phai dien ïa ki sngi jinglong khynnah lang bad u ka Kong Celina ka la ong, “i Madeng(Archbishop Dominic) im dei u khynah uba shait ba khlaiñ bad i long iba dom riang, lehse ka jingdomriang ka dei na ka daw ka jingban ka jingshitom kum u khynnah rit hynrei im dei pat iba buhnud. Im dei ruh u khynnah ba shang makia hynrei i ba shong khop beit ha ïing. Naduh dang rit i long u khynnah uba stad bad uba riewblei bha haba i ïoh kano kano ka kot kaba kren shaphang Blei i da pule pynleit jingmut bha ruh”
Shuh shuh ka la ong, “Naduh dangrit i la ïohsngew ïa ka jingkhot jong u Blei lehse bad dei ha u snem 1962 ba i leit ban rung sha ka ïing pynkhreh ban long riewniam tad haduh ba in da pyndep ïa ka jingpule pyntbit kyrpang haka Liturgy im ran dien na ka jingkhot kaba i la ïohsngew”.
Ka la ïathuh ruh ba ynda u Archibishop Dominic Jala u la long lyngdoh bad ynda u la long u Lyngdohsad u dei u bym ju klet ïa ka ïing ka sem bad ïa ka shnong ka thaw.
“Haba don ba shitom mano mano napdeng jong ngi i dei iba nyngkong tam ban poi leit jngoh ne leit pynlong jingduwai bad kum u kpa mynsiem bad u hymmen u para bad u kñi i ju hikai ïa ngi baroh ban long kiba ieid ïa ki para marjan bad ban ïarap ïa kiba duk ba jynjar bad kane ka dei ka jingkynmaw ba tympang ba ngin ym klet lano lano ruh ïa i Madeng. Haba don mano mano ba khlad ha shnong wat hapdeng ka jingbynkam ruh i ju ai por khnang ban wan ai mynsiem ïa ki” ka la bynrap.
Kumban shu pynkynmaw ba u Most Rev. Dominic Jala SDB.DD u la khlad noh na ka jingjia aksiden kali ha Colusa County, Oakland, California, United States of America ha ka 10 tarik Risaw 2019 ha ka jingleit jong u sha USA ban shim bynta ha ka ICEL (International Commission for English Liturgy) kaba u long ruh u Secretary General jong kane ka Commission.
Ïa u Most Rev. Dominic Jala, la kha ha ka 12 Naitung 1951 ha Mawlai Phudmuri bad la kyntang Lyngdoh ïa u ha ka 19 Naiwieng 1977bad la thung ïa u kum u Archbishop jong ka Shillong Archdiocese ha u Nohprah 1999 bad ïa ka jingkyntang Lyngdohsad ïa u ka long ha ka 2 tarik Naitung 2000.