Palat 200 ngut pyndep jingpule ki Samla ha ki sur jingrwai bad jingtem na Institute of Music ka JSKJPA

0

Shillong, Risaw 10: Palat 200 ngut ki Sama ba pule ha ka Tonic Solfa, hikai tem ksing bad duitara bad kiwei kiwei ki la shah pynkup burom ha ka Convocation kaba 9 jong ka Board of Assemby Institute of Music jong ka Jingïaseng Samla KJP Assembly ha ka sngi Saitjaiñ.
Ïa kane ka Convocation la pyllong ha Auditorium jong ka Synod College ha kaba u Bah Michael Kharsyntiew, Trustee jong Ktiew Turst ba London bad u rangbah ba shakri ïa ka imlang sahlang ha ka jylla u la long u Kongsan.
Ïa ka Convocation la pynïaid da u Chairman ka Singing Ciommittee jong ka JSKPJA, u Rev. SG Ryngksai bad la ïadon lang ruh u Rev. RR Rapsang, Administrative Secretary Incharge JSKJPA, nangta u Director ka Institute,u T.Bn EW Kharsohnoh, ki nongkitkam ka jingiaseng Kynthei bad kiwei kiwei.
Kine 200 ngut tam, kidei ki Samla pule jong ki Institute kiba don ha ki Balang, District bad Presbytery kiba la pynïasoh bad ka Institute jong ka JSKPA.
U Bah Michael, uba la kular ruh ban rah sha ka Turst ïa ka jingpan jingïarap ka Institute ban pyndep ia ka building bad kumjuh ruh uba la ai jingïarap shi lak tyngka na ka bynta ka Institute, ha ka jingkren jong u, u la pynpaw ka jingsngewkmen ba kane ka Institute ka la nang ïai kiew katba nang mih ki por bad kaba la nang ïai pynmih ïa ki Samla kiba pule ïa ki sur jingrwai khamtam eh ha kaba thaw bad pynmih ïa ki sur bad ki jingtem sur tynrai.
U la ong ba ka jaidbynriew Khasi kadei kaba riewspah ha ka Kolshor bad ka don la ki jong ki sur bad ki jingtem tynrai. “Ngim dei ka jaidbynriew kaba riewspah ha ka liang ki karkhana bad ki kad khaïi kumba long kiwei ki jaka jong ka ri ne jong ka pyrthei, hynrei ngi dei pat ka jaidbynriew kaba riewspah ha ka liang ka Kolshor. Namarkata ngidei ban ñiewkor ïa la ka jong ka Kolshor”, u la ong.
U la kyntu ruh ïa ki samla pule kiba la pyndep ïa ka jinghikai na kane ka Institute ba kin leit sha ki Balang bad sha ki Shnong ban hikai ïa kiwei de kiba angnud ban nang bad tip ïa ki sur jingrwai bad kumjuh ruh ïa ki jingtem.
Ha kane ka Convocation la sam ruh ïa ki Certificate jong kine baroh kiba la pyndep ïa ka jingpule jong ki ha ki department bapher bapher. La ïoh ruh ïa ki jingrwai sur tynrai bad ka sur jingput besli bad duitara ïa ka jingrwai niam ba pawnam “Nga jied ï’U Jisu ba la ïap”, kaba long ka jingrwai ba la rwai ruh ha ka phlim Nabon.

Leave A Reply

Your email address will not be published.