Ka elekshon jied ïa ki nongmihkhmat ba thymmai sha ki ar tylli ki Autonomous District Council jong ka jylla kynthup ia ka Khasi Hills Autonomous District Council bad ka Jaintia Hills Autonomous District Council mynta ka kynti ka la kynjah bha hynrei la ïohi pat ba ka shongshit tang haki rynsan social media. Kumba la ïohi bad sakhi ha man ki jaka ba don ki rynsan ïalap elekshon khambun hi dei ki khynnah rit kiba ïa risa ïa kynhoi katba ki rangbah bad kiba la kham san ki duna bha. Haba kumne kumno kein ki kyrtong kin lah ban pynshai ïa ki nongrim ba ki don. Ym tang katta watla ki don ki social media kiba ju leit ring bad pyni pat ha ki youtube bapher bapher jong ki kin ym ai lut kumba dei namar kin jied beit tang ïa kito ki bynta kiba kham sngewtynnad bad kham khring ïa ki paidbah. Kum ka nuksa lada u kyrtong lane ki nongïalam jong kano kano ka party ki kren sngewtynnad katno kato hynrei lada ka jrong palat kin ym thep shuh ha ki youtube jong ki. Hynrei tang lada ki nongkren ki nang ban kren birïa bad kren kham khor khlem pynslem kin sa thep pynkloi.
Lada ka long kumne ka rukom ïalap elekshon ki paidbah kin shem jingeh bha ban bishar ïa ki kyrtong kiba wan ban pan jingkyrshan. Kumno kein kin rai lada sha ki lympung ïalap elekshon ruh kim leit bad ha rynsan jongki rynsan social media ruh kim ïoh ban peit pura ïa ka jingkren jong u. Kane ka buh ha kaba eh bha lada dei lei lei kito ki kyrtong kiba dang mih ban ïakhun ha ka sien kaba nyngkong eh. Kumta la sngewdei ruh na bynta ki kyrtong lane ki party ba katba lah ban ai pyni live lane ai live ïa ka jingialap elekshon khnang ba ki paidbah kin ïohi naduh kaba sdang haduh kaba kut jongka jingïalap elekshon. Da kaba leh kumne, ki paidbah nongkyrshan kin sa lah ban bishar bad shim ïa ka rai la ki i long neem ban pynjop ne kyrshan ïa u kyrtong ba ki i mon.
Ha kawei pat ka liang da kaba leh kumne, kito ki paidbah kiba ym ju smat ban leit sha ki rynsan ïalap elekshon ki lah da kaba suk ban peit ha iing ynda ki la dep kam lane dep bam mynmiet lada jia ba baroh ki party lane ki kyrtong ki ai live haba don ki jingïalang ïalap elekshon. Kane kan ïarap ïa ki paidbah ha kawei ka liang ba kin lah ban shim rai bad ha kawei ka liang pat kan pynsuk ïa ki party ne ki kyrtong ba ki ym da donkam shuh ban leit shaduh ki jaka ba kham kyndong ban leit ïalap elekshon.
Lah ruh ban kdew hangne ba kumba ka paw hi, lada ki nongthep kiba don baroh 30 hajar ngut ha kawei kawei ka constituency hynrei ka jingpoi ki paidbah sha kano kano ka jingïalang kan dei peit la kumno kumno 500 ngut haduh 1000 ngut.
Kumba long mynta lei lei lada poi tang 500 ngut ki paidbah ka la buh bha namar bun ki da sngewtynnad shuh ban leit sha kito ki jingïalang ïalap elekshon khamtam lada kam don kano kano ka jingmyntoi ïa ki. Katno ngut eh kiban leit da ka mon sngewbha ban pynlut nalade ïa ka bai kali, ka bai bam khlem da khein ïa ka bai sngi ha kum kane ka juk kyrduh khamtam lei lei haba ka la dei ka por long skul, ka por ba ka jinglut ka bun bha la ka long naduh ka bai kot, bai uniform bad bun ki bai bai ba bun jait kiba ju mih ha ka por sdang skul. Kawei ruh ba kane ka dei ka por ba ki paidbah ki dang bunkam ha ki lyngkha rep kumta kan long kaba eh bha ban khring ïa ki nongsngap sha ki jaka ïalap elekshon. Tangba la katta ruh da ka jingieid kito kiba la ïoh ia ki jingmyntoi kin leit beit sha kine ki jingïalang kum ka dak ban pynpaw ka jingsngewnguh ïa ki jingïarap ba ki la ïoh.
Ha kawei pat ka liang, dei ruh ban ai ka jingiaroh ia ki paidbah kane ka juk mynta namar kim mih shuh ban pynpaw khmat ialade ha ki jingialang ialap elekshon namar kane kan iarap ruh ia ki ban lait na ka jingshah peit khmat ha ki paralok parajor lane ki paramarjan para marpa. Kaba kham ktah eh kum kine ki jingsngew bad ki jingpeit matdong ki jur bha ha ki nongkyndong khamtam lada ki paralok ne ki paramarjan ki jop katba u kyrtong ba ki kyrshan u rem tang katta ka jingshah kren shah kynkok bad shah kynhoi ka la sdang bad kan iai bteng da ki bnai bad ki snem. Nangta lada jia ba don ki skim aiu aiu ruh kumba ka la jia bad ka dang bteng ban jia, kin shah pynduh lut bad shah pynshoi pynshad lada jia ba ki paw kyrteng ruh. Ka jingshah peit khmat ba kim dei ki nongkyrshan jong u MDC lane u MLA kan don beit thik kumba la buh da u muhor ha ka shyllang.
Hynrei da kaba ki shong ha iing khlem da leit sha kino kino ki jingialang bad minot thop ha la i kam i duk la jong, yn ym don mano mano ban peit khmat lane ban kynmaw ban kren ban kynthoh ia ki. Tangba iakum kine ki briew ruh ki skim kim ju kham ioh namar kito ki nongialam jong ki party ne jong u MLA ne MDC ki artatien ioh kumno re kumno ki kyrshan ia u kyrtong uba rem.
Don pat ki jait briew kiba ju mih beit ban leit iashad leit ia kmen ha baroh ki kyrtong khamtam ha kito ki kyrtong kiba pynbiang ki kali bad shongshit lei lei sa ki jingrwai. Ia kum kine ym lah satia ban ong iano kin kyrshan namar lada long rally ka party A ki deng lama jong kato ka party lada long rally ka party B ruh kin leh kumta ter ter khlem da salia. Tangba ha kaba khatduh hi dang lah kine kiba mih bad leit lut ha baroh ki jingialang namar khatduh ym don kiba lah ban peit khmat ia ki lada jop ne rem mano mano ruh.
