Kynduh mawsiang ka St. Jude SS Umpher ba mad biang ïa ka jingshlei um, hap ai shuti ïa ki khynnah

Nongpoh, Jymmang 29: Ki bor pynïaid ka skul St. Jude Secondary School, Umpher ha ka thaiñ Byrnihat ki la hap biang ban kynduh mawsiang ban pynlong skul, namar tang hadien 2 sngi ba u MLA ka Jirang u Bah Sosthenes Sohtun bad u Deputy Commissioner ki la wan ban jurip ïa ka jingshlei um kaba la ktah ïa katei ka skul bad mynta ka sngi ruh ki la hap mad biang ïa ka jingshah ktah ka jingshlei kaba dei na ka jingjur u slap mynta ka step naduh ka por 6 baje ei ei.
Kane ka skul kumba la sakhi man la u snem, tang shu dei ka por lyiur ne ka por slap, ka hap ban mad ïa kane kaduh ka jingeh jong ka jingshlei bad ka daw ka long bym kim biang satia ki nala um ka surokbah 4-lane ha Ri Bhoi bad kawei ka daw ruh ka dei ka jingtih khyndew na ka thaiñ Killing.
Kumba la sakhi mynta ka sngi, ki bor pynïaid skul ki la hap ban ai shuti noh ïa ki khynnah skul, kaba dei hadien ka jingshlei um, ba ka um ka la rung shaduh ki kamram Klas bad ki don ruh ki khynnah ba sah Hostel ki la sahkut ha Hostel ba kim lait shuh ban mih na ka daw jingshlei um ha ka phylla katei ka skul.
Haba la ioh ba ïa kren bad u Principal katei ka St. Jude Secondary School, Umpher, u Br. Nicholas Rimai, u la ong ba kane ka jingshlei um ka la ktah shisha ïa ki bor pynïaid skul, namar tang shu wan u lapbah katei ka skul ka la shlei um bad kumba lap ïa ka daw la kynnoh ba kane ka ktah ruh na ka jingtih khyndew na ka thaiñ Killing ba ka khyndew ka tuid sha ka wah ba ka sa set ïa ki nala um haduh ba poi sha u pud ka jingshlei um.
U la ong ruh tang na ka daw ka jingshlei um, la hap ban ai shuti noh ïa ki khynnah skul, namar ka um ka la rung sha ki Kamra Klas bad ka la pynjot ruh ïa ki jingjingdon jingem hapoh ka skul.
Kum u khliehduh katei ka skul, u Br. Nicholas Rimai, u la ong ruh ba u khmih lynti ba ka jingwan jurip u MLA, ka NHAI bad u Deputy Commissioner ka Ri Bhoi kin lah ban weng noh ïa kane ka jingshlei um bad wat mynta ka sngi ruh hadien ka jingshlei um la phah da ka shithi sha u Deputy Commissioner ka Ri Bhoi ba un shim khia lem ïa kane ka kam bad ruh ban pynurlong kumba la kular ha ka jingwan jurip u MLA, NHAI bad DC ba kin shim khia ban weng noh ïa kane ka jingshlei um khnang ba kan nym ktah shuh ïa ki khynnah skul bad wat ïa ki paidbah nongshong shnong kiba ju mad kajuh ka jingeh na kane ka jingshlei um, u la bynrap.