Ka jingjah ki arngut kan ym ktah ïa ka jingtuid ki nongkai sha ka jylla : Paul Lyngdoh
Shillong, Jymmang 29 : U Myntri ba peit ïa ka tnad Tourism jong ka sorkar jylla, Bah Paul Lyngdoh ha ka sngi Palei u la ong ba ka jingjah rngai jong ki shijur ki nongwankai ha ki thaiñ Sohra ha kine ki khyndiat sngi ba la dep, kan ym ktah satia ka jingtuid ki paidbah ban wan jngohkai sha kane ka jylla.
Kane ka jingkren jong u Myntri ka dei halor ka jingkylli ba haduh katno ki nongwankai na kiwei pat ki bynta jongka Ri bad ka pyrthei ki sngew shngaiñ haba jia kum kine ki jingjia ïa ki shi kurim na na Indore, Madhya Pradesh kiba wan kai sha Sohra hadien ba ladep ïathoh.
“Kumba long haduh mynta hi, baroh ki hotel, ki resort bad ki homestay ba don ha ka thain ki la dap lut namar ka jingbun palat ki nongwan jngohkai pyrthei,” ong u Myntri.
Da kaba pynpaw ba katei kadei ka jingjia ba sngewsih, u Myntri u ong ruh ba na ka tnad hi kin ym lah ban uh ïa ki pulit ha man ka shi inshi ba don ki jaka jngohkai pyrthei.
Related Posts
Da kaba ai nuksa ba lada uwei u rangbah na Shillong u jah sha Thailand ba um wan phai shuh kam mut pat ban ong ba ka Thailand kam shngain na ka bynta ki nongjngohkai pyrthei.
U la ong ruh ba mynta ki la don bun ki nongïalam lynti ïa ki nongjngohkai pyrthei ban leit peit kum ïa ki jingkieng jri bad kiwei kiwei. “Hynrei lada kita ki nongwan kai ki kwah ban leit hi la ka jong kaei pat ka bynta jong ka sorkar? Kumta ka jingnang bun ki nongwan kai sha ka Sohra ka pyni ba ka thain ka dang dei ka jaka kaba khring bha ïa ki paidbah ban wan kai.”
Shuh shuh u Bah Paul ula ïathuh ba halor kane ka kam, na ka liang u Myntri Rangbah u la dep ban shimkhia bad na ka liang u Bah AL Hek ba dei uwei na ki Myntri Sorkar u la leit hiar hi sha ka jaka ban buddien halor ka jingleit wad ban pyllait im ïa ki.
Haba jubab pat halor ka jingkynthoh da u para jong u ba ka jingwad ka suki palat, u Myntri u la ong, “Ka jingkren jong u kadei namar ki shah ktah ha katei ka jingjia bad kumta u lah ban kren shibun kiei kiei kiba long palat ruh. Hynrei kumba phi ïohi ïa ka jinglong ka jaka, ka jinglong riat kumta ka eh bha ban leh ei ei ym kum ha ki ri thor.”