Nongpoh, Nailar 31: Halor ka jingkynnoh ba don ki longïing kiba ym ioh khaw ration tang namar ba kim don ïa ka Aadhar Card kumba la kynnoh da ka seng Ri Bhoi Youth Organization, kane ka seng mynta ka sngi ka la leit ban ïa kynduh ïa ka Inspector of Food Civil Supply ka Ri Bhoi, ka Kong B. Khongwir na ka bynta ban pan jingshai halor ka jingkynnoh ba don kita ki longïing kiba ym ioh khaw ration tang na ka daw ka jingbym don ïa u Aadhar card.
Haba leit ban ïa kynduh ïa katei ka Inspector of Food Civil Supply ka Ri Bhoi la ïalam da u President katei ka seng, u Bah Baïateilang Lapang ryngkat ka jingsynran lang ki dkhot, kiba la leit ban pan jingshai halor kane ka jingkynnoh ba don kita ki longïing kiba ym ioh khaw ration tang namar ba kim don ïa u Aadhar Card.
Haba kren sha ki lad pathai khubor hadien ba la wan kynduh ïa katei ka ophisar, u President ka RBYO, u Bah Baïateilang Lapang, u la ong ba katei ka ophisar ka la pynshai sha ka seng ba kam don kano kano jingpynduh khaw ration ïa kiba ym don ïa u Aadhar card bad wat kito kiba ym don Aadhar card ruh ki don ïa kata ka hok ban ioh ïa u khaw ration.
Shuh shuh, u la ong ruh ba ka seng RBYO lyngba u Bah Baïateilang Lapang kumba la ioh ka jingpynshai na katei ka ophisar, u la buh kata ka jingkyntu ïa ki paidbah ki bym pat don Adhaar Card, haba ki kynduh ïa ka khep ba kim ioh ïa u khaw rashon ki dei ban pyntip sha ka seng bad ha kajuh ruh ka por ka ka seng ka kyntu ruh ïa ki nongsam khaw ne wat ïa ki rangbah shnong ha Ri Bhoi, ba kim dei ban pyntieng ne pynbor ïa ki paidbah bym pat don Adhaar Card lane ba kin pynduh khaw ïa ki.
Haba laioh ban ïa kren ruh ba katei ka Inspector of Food Civil Supply ka Ri Bhoi, ka Kong B. Khonwir ka la pynshai ba haduh kine ki sngi kam pat don kano kano ka jingpynduh khaw ration ïa kiba ym don Aadhar Card bad kam pat don hi ruh kano kano ka jingbtah ban pynduh khaw ration ïa kiba ym don Adhar Card, hynrei ka don tang ka jingpynshai sha ki paidbah ba ki dei ban don ïa u Aadhar Card namar lyngba u Aadhar Card kin ioh shibun ki jingmyntoi na ka sorkar.
