Shillong, Nailar 02 Ki paidbah nongrep kiba don hapdeng ka Ryngku kaba don ka wah Khasimara bad ka wah Dholai kila kynduh jingeh shibun namar ba kam shym don ka jingkieng ïaid kjat lane ka sub-way haba shna ïa ka jingkieng ïaid kali, kane kala buh ïa ki nongrep ka thaiñ kaba hap hapoh jong ka Mawsyrnam Block ha pdeng ka jingeh kaba khraw.
U bah Odas Pdahkasiej President jong ka Hills Farmers Union jong ka Mawsynram Block, la ong ba ka long kaei kaei kaba sngewsih ban ïohi ba ka tnad PWD Mawsynram Division kam shym la lah ban bthah ïa u kontraktor ban shna ïa ka subway lane ka lynti ïaid kjat ha ka wah Dholai ban ïaid ki briew.
La ong ba haba jur ka slap bad kane ka wah ka dap um ki paidbah kim lah ban ïaid na shiliang sha shiliang, wat ki khynnah skul kiba hap ïaid lyngba kane ka wah ki hap ban pep skul noh namar bym don lynti.
Na ka liang jong ki nongrep ki hap ban kylliang kali bad la kit da ki briew na shiliang ka wah sha shiliang ka wah ïa ki marrep bad kane kala wan rah ïa ka jingduhnong kaba khraw namar ka ktah ïa ka dor jong ki marrep.
