K ano kano ka jinglong ka saiñhima sima kam ju neh ne sah hajuh hynrei ka kylla stet katkum ka jingïaid jong ki shalyntem ne ka jingtyllun jong ka por. Ha Meghalaya ruh, imat, nangne shakhmat, ka saiñhima sima ka la kylla dur noh da kumwei pat. Lah ban ïohi ïa kane tang ha shwa ban poi u snem 2023, namar dei ha une u snem ba ka samoi jied syiem (MLA Election) kan sa long biang ha ka jylla Meghalaya ban jied thymmai ïa ki Nongmihkhmat paidbah ki ban mihkhmat na ki Constituency bapher bapher jong ka jylla Meghalaya.
Ki Seng Saiñpyrthei kiba kham kongsan ha Meghalaya kiba don MLA kumba long mynta ki long ka NPP, ka TMC, ka UDP, ka HSPDP, ka PDF, ka KHNAM, ka NCP, ka Congress, ka BJP nalor ki Independent. Ki party kiba kham bun eh ki MLA ki long ka NPP bad ka UDP katba ka PDF bad BJP ki don tang mar ar ngut. Arngut na ka PDF ki la phet noh sha ka NPP bad arngut ki MLA na ka HSPDP uwei u la pynïasoh bad ka UDP bad uwei u pat bad ka NPP.
Kane ka jingdon jong kine ki MLA ha kine ki party ki la kylla rong noh tang shu poi ka samoi jied syiem. Ka Congress kaba dei ka Party kaba khlaiñ eh bad heh paid naduh ki por ba mynshwa ha Meghalaya ka la kylla noh hadien ba ka metbah ka la troiñ noh na Delhi. Ka NPP kaba khlaiñ kynsan ha u snem 2018 (na ka jingdon jong ki 2 ngut ki MLA ha u snem 2013 mynta ka kiew sha ka jingdon 20 ngut ki MLA ha u snem 2018 ka lah ban kham hiar noh namar ka jinglong nongïalam jong ka ïa kane ka Sorkar Meghalaya Democratic Alliance (anti-incumbency) ba mynta. Hynrei ka watla katta ka jingleit pynïasoh jong ki MLA na kiwei ki Party sha ka NPP ka dang thnem bha. Bun kiba dang ïap beij ïa ka NPP watla ka jingkdew kti pyrshah ïa ka NPP ka jur bha.
Ka jingwan ka Trinamool Congres ha Meghalaya bad ka jingkiew bha jong kane ka party ha rilum Garo ruh kan pynduh mynsiem ïa ka NPP. Kaba kham ima eh ïa mynta ka dei ka jingpaw pyrthei jong ka Trinamool Congress. Kane ka seng saiñ pyrthei kaba don ïa ka Headquarter na Kolkata ka la sdang suhthied bha ha kane ka jylla Meghalaya na ka daw ka jingtrei borbah jong ka I-PAC. Ki briew kiba don hapoh ka I-PAC ki la rung lut sha ki kyndong kynshrot jong ka jylla Meghalaya ban twad jingmut na ki paidbah nongshong shnong ka jylla haduh katno ki angnud ïa ka jingkylla.
Hynrei, kaba kham sngew sammut ka long ba ka Trinamool Congress ka dei ka party kaba thymmai hynrei ki MLA pat ki dei kiba shu ryngkoh lut na ka Seng Congress dang shen tang na ka daw ba kim sngewtynnat ïa u Bah Vincent Pala kum u nongïalam. Kane ka long thik kumba theh ïa ka waiñ bathymmai ha ka lya snieh kaba rim.
Ka UDP pat kum ka Party riewlum baheh tam ha Meghalaya kam da don thymmei eh sha rilum Garo. Ha rilum Khasi Jaiñtia ka jingïakhun ka bym lah batai satia. Ka BJP kan kham kiew ha ka kyrteng u Modi khamtam sha rilum Garo bad katto katne ki jaka ka Khasi Jaiñtia Hills. Hynrei ban jop ka dang kham jwat namarba ki paidbah kim da kham imon ïa kane ka party na ka daw ka jingmih ki khubor ki jingshah thombor jong ki Khristan sha kiwei ki jylla.
Ka HSPDP kan ym kiew ne hiar eh, hynrei malu mala kin jop hi iwei ar kum ki riewshimet. Ka PDF kan hap trei tyngeh ban pynkhlaiñ bad seng nongrim bha ïalade lada ka kwah ban jop kham bun lym kumta ka lah ban nang hiar pynban na kaba la ïoh mynshwa. Kane ka party ruh ka i don jingkyrmen bha namarba watla arngut ki MLA ba kynthup ïa u Bah Hamletson Dohling bad u Bah Jason Sawkmie Mawlong ki la kyntiap sha ka NPP hynrei ka PDF ka dang don ïa ki arngut ki MLA kum u Bah Banteidor Lyngdoh bad u Bah Gavin M. Mylliem kiba dang ïai neh beit haduh mynta ha la ka jong ka nongrim ban pynim bad ban pynrhem ïa u Mombati jong ka PDF.
Ka KHNAM kam don lyer shuh bad sa tang ban shu khylliap lama na ki dak ki shin kumba ka paw mynta namarba ka KHNAM hadien ba u MLA jong ka KHNAM u Bah Adelbert Nongrum u la resaiñ bad leit pynïasoh noh ïalade bad ka Voice of the People Party ba ïalam da u Bah Ardent M. Basaïawmoit.
Ka jingkylla kaba khraw ha ka saiñ hima sima ka dei ka jingryngkang dieng kper ne phet seng jong ki Sitting MLA kiba mynta. Kin ki MLA ba la resaiñ noh ki la ryngkoh noh sha kiwei kiwei ki Party katkum ka jingkheiñ bad sngewbit jong ki. Don ki ban dang jop biang bad lehse kin don ruh ki ban sa shah rem noh.
