Kylla khongphong ka kali Maruti Ignis, mynsaw 2 ngut ki samla ha Umsning By Pass

Nongpoh, Jylliew 29: Watla ki bor Pulit jong ka Ri-Bhoi District ki la maham tyngeh ïa ki samla kiba ju mlien ban pynlong jaka lehkai ha surok bah National Highway-6 khamtam haka sngi u Blei, da ki spah ngut ki nongñiah thuk thuk mynta ka sngi ki la hiar biang sha ka thaiñ Umsning By Pass ryngkat ki kali saw shaka ban ïaleh stunt bad khyllew haduh ba kawei ka kali Maruti Ignis ka la kylla haduh 2 ne 3 khongpong hapdeng surok bad 2 ngut ki samla ki la mynsaw ha katei ka jingjia.

Katkum ka jingtip ba la ïoh lum kane ka jingjia ka la jia mynta ka janmiet sngi u Blei haka por kumba 4:30 baje eiei haka shnong Umkaliar haka thaiñ Umsning By Pass ha kaba 4 ngut ki samla kiba dang haka rta ba 18-20 snem eiei ki la wan da katei ka kali Maruti Ignis kaba don ïa u number ML 05 W 7020, hynrei namar ka jingpynher sted u nongñiah katei ka kali u la leit ban tynrah beit ïa u Divider jong u surok bah National Highway haduh ba katei ka kali kaba ki shong ka la kylla 2 ne 3 khongpong hapdeng surok haduh ba u nongñiah lem bad uwei pat ki la mynsaw jur katba 2 ngut kiba shong lang ha katei ka kali ki la phet krad na katei ka jaka.

Ki bor Pulit ka Umsning Police Station lem bad ka Ambulance jong ka 108 ki la poi marmar ha katei ka jaka ban pynkit ïa kiba la mynsaw sha Umsning CHC ban ïoh ïa ka jingsumar bad ka jingtohkit ka dang ïaid shakhmat.

Ki Pulit ka Ri-Bhoi ki la ju pynlong ka jingtalasi bad ai jingsneng ruh ïa kitei ki samla kiba ju mlien ban leh ïa katei ka kam, hynrei I kumba kim patiaw satia ïa ka jingsneng jingkraw bad ka jingmaham jong ki pulit bad ka la donkam ba ki bor pulit kin leh da kaba tyngeh ban lait na kano kano ka jingjia ba sngewsih khamtam ki paidbah kiba leit ba wan ha shilynter jong utei u surok.

Kane ka jinghiar jong ki kynhun ñiah thuk thuk man ka sngi u Blei khamtam ban ïaleh stunt ha surok bah National Highway haka sngi u Blei ka la wanrah shisha ka jingbitar haka juh ka por, namar ka jingshitkhlieh ka rukom ñiah khyllew kaba pyntieng pynsyier ïa kiba bun ki nongleit nongwan khamtam ki kynthei khynnah.

Ka Ri-Bhoi District kadei kawei ruh ki district kaba jur bha ka jingaksiden kali, kaba la wanrah ruh shibun ki jingjia ba sngewsih bad ka jingduh noh ki mynsiem briew, hynrei I kumba kitei ki samla kim kheiñ snep ïa ki pulit, ïa ka jingim lade bad khlem da pyrkhat ruh ïa ka jingim jong kiwei bad ka la dei ka por ba ki pulit ki dei ban leh da ka kam bad da kaba tyngeh pyrshah ïa ki samla kiba ju pynlong jaka lehkai ha surok bah man la ka sngi u Blei ban nym buh ïa ki paidbah ba leit ba wan hapdeng ka jingsyier.