Shillong, Lber 11: Ki jaka kiba mynshwa kiba long ki ktem ba rieh tngen jong seng lehnoh ka Garo National Liberation Army (GNLA) ka la kylla long mynta sha ki jaka jngohkai pyrthei hapoh ka South Garo Hills District.
ïa kane la ïathuh da u Myntri ka sorkar jylla bad u MLA ka Siju-Rongara u Rakkam A Sangma ha ka sngi nyngkong, haba ïaroh ïa ka jingtreikam jong ka sorkar MDA ha kine ki 6 snem ba la leit.
U la ong ba ha ki por ba mynshwa ka jingdon ki lehnoh ha ka thaiñ Garo Hills ka la kylla long ka daw jong ka jingsngewkhia hynrei hadien ba ka sorkar MDA ka la wan ha ka bor ka la wanrah ka jingkylla bad kaba la wanrah ka jingpynthikna ba kan don ka jingkylla ha baroh kawei ka sawdong sawkun jong ka thaiñ Garo Hills.
“Mynta ka Garo Hills ka la kylla long kum ka bneng. Ka la long ka thaiñ kaba shongsuk shongshngaiñ,” bynrap u Sangma.
Na ka liang utei u Myntri u la ithuh ruh ba mynta da ki phew hajar ngut ki nongwan jngohkai napoh ka jylla bad kumjuh ruh kiba nabar ka ri ki la wan ban jngoh ïa katei ka jaka hapoh ka konstituensi jong u.
“KI nongwan jngohkai ki la wan ruh ban jngoh ïa kane ka jaka kaba kyrpang, kaba la ju pyndonkam kum ka jaka riehtngen jong ka seng GNLA bad ïa kane mynta la pynlong kum ka jaka jngohkai pyrthei. Kane ka la long ka jingkyrkhu ïa kiba bun naba ki la ïoh ka lad ban kamai jakpoh na ka jingwan ki nongwan jngohkai,” u la ong.
U la ong ruh kumjuh ba mynta ki la don satang khyndiat ngut eh ki briew kiba la wan ban ïakynduh ïa u ban pan pisa naba ki la ïoh ka lad kamai da kaba pdiang sngewbha ïa ki nongwan jngohkai sha kane ka jaka.
