Ka jingkhapngiah ka dei ka bynta kaba hakhmat eh kaba la buh ïa ka jingim briew ha ka jingma namar hap ban ïaid napdeng ki surok kali namar ym don shuh ban ïaid ha ki lynti ïaid kjat ba la dap smam da ki nongshong die madan naduh Motphran haduh Lad UmSohsun bad kumjuh ruh wat sha Khyndai Lad. Kane ka jingkhapngiah ka la wanrah ruh ka jingsniewduh jong ka nongbah Shillong. Ki nongleit nongwan tang shu la poi ha G.S Road shaduh Motphran ki la ki la sniew mynsiem lypa namar wat tang ka jaka ïaid ruh ym don shuh. Ka lynti ïaid kjat ka la nang rit namar ka jingtur ki dukan kumjuh ruh ka surok ïaid kali ka la nang rit da ka jingmih jong ki nongdie madan naduh Motphran ter ter haduh ban da poi sha Lad Umsohsun.
Ka long ruh kaba ima ïa ki nongïaid lynti lada ki bor ba dei peit la ka long naduh ka Hima Mylliem, District Council bad ruh ka Municipal bad ki bor synshar district kim leh ei ei noh mardor halor katei ka jingkhapngiah da kaba sdang naduh Iewduh.
Haba phai sha ki nongwan iew tang shu rung sha ki basa ki la hap ban ïaid da kynriang namar ki dukan kiba don harud ka lynti ïaid kjat ki la buh syndon da ki tiar ki tar haduh mar shiteng jong ka lynti. Ym tang katta, la nang pynkhapngiah shuh shuh da ka jingdon sa ki nongdie madan na sha shilliang kaba poi haduh u pud ba tang ban ïaid arngut ruh i kumba ym long shuh ha kitei ki lynti ïaid kjat kiba la buh ban ïaid saw ne san ngut shisien ïaid.
Balei kine ki jia, hato dei ba ai mon bad ai laitlan ki bor pynïaid lane dei ba la aiwai syndon ïa ki lynti ïaid kjat ban die jingdie. Kaba kham iwit eh kadei da ka jingïohlad ki nongdie madan tang shu poi ka por janmiet ha motphran syndon haduh wat tang ban ïaid lynti ki briew ruh ym don jaka shuh. Ka long kaba itieng ruh ïa ki nongïaid lynti namar ki hap ban peit bha ba ha ka por ba ki hiar na ki kali kin ym dei ïuh ïa kitei ki jhur ne ki jingdie kiba don hangtei. Kaba kham i syier eh kadei haba ïalam khunlung namar hap ban kiar na baroh arliang kata na kitei ki nongshong dukan bad ruh na ki kali namar tang shu bakla shilliang shilliang lada ym shah tim shah phah siew la shu mynsaw ei.
Haba phai pat naduh Motphran ter ter haduh ban da poi sha lad Umsohsun la ïohi ba ka jingdon ki nongdie madan ka la pynwit bha haduh katta katta. Baroh shi lynter ka surok la shlei da ki nongdie jingdie suda bad teng teng haba ïaid ar tylli ki bos la i kumban dei lang ïa ki briew ruh kiba ïaid lynti. Ka lynti ïaid kjat i kumba ka kylla long kum ka jaka shong dukan bad ka surok kali pat kum ka jaka ïaid briew.
Hato ka sorkar kam lah seh ban tuklar halor kitei ki jingjyllei jong ki nongdie madan da kaba buh noh da kawei pat ka jaka ba ki shong kumba la leh teng da ka Hima Mylliem kaba la ïa jaka ïa ki nongdie jaiñ lilam ha khrum jong ka jaka pynieng kali Jaïaw. Lada ka Hima Mylliem ka lah kan eh aiu ïa ka sorkar ban buh noh da ka jaka kyrpang na ka bynta ki nongdie madan.
Lada ka Sorkar ka khanglad noh shisyndon ïa ki kam khrong bad ïa ki kam die madan bad ban mana tyngeh ai ki, kane kan ïarap shisha ka jingpynïoh pat ïa kata ka bynta jong ka burom ba la jah jong kane ka nongbah kaba la tip kum ka Scothland of the East. Ka aiñ barabor ka long ban teh lakam ïa ki jinglong ba lyngkar bad ban wanrah pat ïa ka jingïaid beit ïaid ryngtih ha ka imlang sahlang.
Lada k a sorkar hi ka lah ban pynduna ïa ka jingdon ki nongdie madan kan wanrah ïa ka jingkhuid bad kane kan pynlong wat ïa ki nongjngoh kai pyrtheiban ïaroh. Ka jingkhuid kumba ngi tip ka khring ïa ki nongleit nongwan kiba na kiwei pat ki thaiñ jong ka ri bad ruh ka pyrthei kumba la sakhi na ka Mawlynnong kaba ki briew ki wan khnang naduh sha shilliang duriaw ban wan peit khnang.
Kumta ka sorkar ka donkam ban ïoh ïa ka jingïatreilang jongki paidbah ha kaba pynneh ïa kata ka nam jong ka jingkhuid kaba la ju tip kum ka Scotland of the East bad la khmih lynti ba ka sorkar kan shim khia ïa kane khnang ba ka burom kan long ïa baroh.
