Shillong, Rymphang 18 : Ka Sorkar Meghalaya ka la pynpaw ïa ka jingangnud ba u khlawait ka Jaidbynriew u Tirot Sing Syiem, un ïoh jaka lem sa ha ka Museum jong ka Ri Bangladesh, kaba thmu ban tei ha ka byndi ba set ïa une u khlawait ha Dhaka.
Kane ka sur kala mih na ka kynhun ki Myntri Sorkar bad ki Ophisar, kiba la leit ban jurip ïa ka byndi ne ïing ba set ïa u Tirot Sing ha Dhaka ha ka sngi Saitjain.
“Ka Sorkar Meghalaya kan sa shimkhia ban ïakren bad ai jingthoh sha ka sorkar Bangladesh ba kan ai jaka lem ban buh ia u motdur u Tirot Sing ha kane ka Museum ba kan tei ha kane ka byndi ne ïing ba set ïa u khlawait ka Jaidbynriew, ha Dhaka” ong u Symbud Myntri Rangbah ka Jylla u Ma Sniawbhalang Dhar haba ïakren bad ki nongthoh khubor ha Dhaka.
Ha kane ka jingjurip ba la ïalam da u Ma Sniawbhalang Dhar, la lap ba kane ka byndi kam shym la don satia ïa ka bui ne ki jingthoh jingtar ne histori halor ka jingset ïa u Tirot Sing ha kane ka byndi.
“Kumba ka long mynta, ka Ri Bangladesh kam don satia ïa ki jingthoh jingtar shaphang u Syiem Tirot, bad ha katei ka byndi kaba la set ïa u ha u snem 1833 haduh 1835, haduh mynta ym shym don kano kano ka jingbuh sahnam” ong biang u Ma Sniaw.
“Ka Sorkar Meghalaya kan thoh sha ka Sorkar Bangladesh ban ai jaka ban buh sahnam ïa u Tirot Sing, namar kumba la ïathuh da ki ophisar ba peit mynta ïa katei ka byndi ba haduh mynta ki dang wad jingtip ba bniah ïa ka jingdon bad ki khana ba dei ban pynsahnam” ula bynrap.
U Ma Sniawbhalang ula ong ba ka Sorkar Meghalaya kan phah ïa ki jngthoh jingtar sha ki bor ba halor ka ri Bangladesh shaphang ka jingim jong u Syiem Tirot Sing khnang ba kin pynneh pynsah lem ïa ka nam bad kyrteng jong une u Syiem ka Jylla.
Kumjuh ruh u Myntri ka Tnad Arts & Culture Bah Paul Lyngdoh ula ong ba ka jingwan Bangladesh jong ka kynhun ki Myntri bad Ophisar ka long ban pynneh pynsah ïa ka nam ka kyrteng jong u khlawait ka Ri-lum Khasi-u Tirot Sing. U ïathuh ba ka Sorkar Jylla kan sa phah ïa ka jingtyrwa sha ka Sorkar Bangladesh ban pynsah nam lem ïa u Tirot Sing ha katei ka jaka ba u pynlut ïa ki sngi ba khatduh jong u kaba yn sa pynkylla museum.
Lah ban kdew hangne, ka Sorkar Jylla ryngkat ka jingïatreilang bad ka Ministry of External Affairs (MEA) ka Ri India, ha ka 16 tarik Rymphang, ki la plie paidbah ïa u motdur sahnam jong u Tirot Sing ha Indira Gandhi Cultural Centre (IGCC) kaba don ha Dhaka.
