Kut noh ka jingkyrmen jong ka Meghalaya ha ka 7th Khelo India Youth Games naba rem SF haka Jharkhand

0

Shillong, Jymmang 12: Ka jingkyrmen jong ka Meghalaya ban ïada ïa ka burom lahduh (takma ksiar) ha ka phutbol jong ka 7th Khelo India Youth Games ka la poi sha kaba kut hadien ba ka Jharkhand ka la pynliem noh ïa ka da 2-1 kol ha ka semifinal ha Begusarai, Bihar, hynne ka sngi Nyngkong.
Ka Jharkhand ka la ïoh ban lamkhmat nyngkong lyngba ka free-kick tang ha ka minit kaba lai jong ka kylla step. Ka bol kaba la shut na jngai ka la rung hapoh phyllaw kol bad ka la ïaid lait na baroh ki rangapdien kynthup ïa u nongap kol ka Meghalaya, u Kangkam G Momin.
Ka Jharkhand ka la bat skhem ïa ka kol lamkhmat kumba shikynta eiei shuwa ba u Banganson Nongphlang un pynïakhaid ha ka minit kaba 58.
Hynrei ka jingkmen ka la neh tang shiphew minit ha kaba ka Jharkhand ka la ïoh biang ban lamkhmat ïa ka jingïalehkai da kaba pynpra ïa ki rangap dien jong ka liang pyrshah bad uwei na ki rangïalehkai jong ka u la ïoh ban pashat thikna ïa ka bol kaba la rung beit beit sha kol.
Ki khynnah ïalehkai jong ka Meghalaya ki la sngewsih hadien ba la pynsawa ïa ka whistle kaba khatduh, namar ka jingkyrmen jong ki ban ïada ïa ka nam lahduh ka la poi sha kaba kut.
Haba phai dien, ka Meghalaya ka la jop ar tylli ki jingïalehkai ha ka Group, kata ka long pyrshah ïa ka Chandigarh da 10-1 bad ka West Bengal da 3-1, bad ka la shah rem shisien ha ka Odisha da 2-1. Kum ka kynhun kaba wan ba-ar ha ka Group A ka la ïoh rung sha ka semi final ha kaba ka la shah rem noh ha ka kynhun ba jop ha ka Group B ka Jharkhand hynne ka sngi Nyngkong.
Ha kawei pat ka semifinal la sakhi ïa ka Odisha kaba la pynjemkhnap ïa ka Mizoram da 5-1 kol. Kumta ka final kan long hapdeng ka Odisha pyrshah ïa ka Jharkhand ha ka sngi Balang.
Kumba ka long, ka lah ban nym don ka jingïakhun na bynta ka kyrdan balai – bad ka Meghalaya bad ka Mizoram kin ïoh takma rnong.

Leave A Reply

Your email address will not be published.