Shillong, K’Lyngkot 21 : Ki BSF Meghalaya ha ka 20tarik mynta u bnai ki la ïoh ban kurup ïa ki jaiñ saree kiba shongdor palat ïa ka 24 lak tyngka na ka khappud jong ka East Khasi Hills, Meghalaya kiba thmu ban khaii beaiñ sha Bangladesh.
Katkum ka kyrwoh na ki BSF la ong ba ïa kitei ki jaiñ la ïoh ban kurup da ki BSF jong ka 04 Bn na ka thaiñ jong ka shnong Pyrdiwah hadien ba ki la ïoh ban bat ïa ki ar tylli ki kali ba kit ïa kitei tiar beaiñ.
Ka kyrwoh ka ong ba ki bor pahara hadien ba ki la ïohi ki la phah sangeh ïa kitei ki kali hynrei la ong ba u draibar um shym la pynsangeh satia bad her bak bak sha ka shnong Pyrdiwah kaba don marjan bad khappud Bangladesh. La ong ruh ba hadien ba ki BSF ki la beh thong ïa kitei ka kali, ki draibar ki la phet krad da kaba ieh noh shadien ïa ki kali.
Ïa kitei ki tiar ba la ïoh kurup la aiti noh sha ka tnad Custom ha Pynursla bad ujor ruh da ka ejahar bad ka PS Pynursla na ka bynta ban pynlong ïa ka jingtohkit kaba bniah bad ban leh ïa kaba donkam katkum ka aiñ.
Ka kyrwoh ka ong ruh ba ki jaiñ na India bad ruh ki jingtah jingpeiñ ki dei kiba jur bha ka jingdawa ha Bangladesh kaba long ka dawbah ban jur ka jingkhaii beaiñ ïa kitei ki tiar sha Bangladesh
