Shillong, K’lyngkot, 20: Kum ka jingpeitngor shwa ka jingrakhe ïa ka Republic Day, ki shipai BSF jong ka 193 Battalion kiba la ïoh jingtip kaba bniah na ki tnat syntiat ha ka sngi Thohdieng ki la ïohkem lai ngut ki nongkhaii drok bad ïoh kurup 1728 tylli ki dawai kuli Yaba na ka met jong ki.
Kane ka jingkhynra ka la jia ha ki bynta kiba hap hapoh ka Ranikor Police Station, South West Khasi Hills district.
Katkum u kyrwoh ba la phah da ki shipai BSF, la ong ba ïa kine ki lai ngut ki la shong da ki ar tylli ki thuk thuk la bat da ki shipai BSF, kiba la thmu ban leit sha khappud hajan ka shnong Ranikor.
Ïa kine ki lai ngut la tip kyrteng kum u Somison Sangma 25 snem ka rta, u Jenel D. Sangma 23 snem ka rta bad u Gopal Barman 27 snem ka rta. Kine ki dei kiba shong basah ha ka shnong Nokrianala kaba hap hapoh ka Dangar Police Out Post, East Khasi Hills District.
Ïa ki dawai kuli Yaba la kurup noh da ki shipai BSF bad ïa ki lai ngut ki nongkhaii dro la aiti noh sha ki Pulit ka Ranikor ban leh ïa kaba donkam.
Ha kawei pat ka jingkhynra, ki shipai BSF jong ka 110 Battalion ki la ïohkem 9 ngut ki nongkhaii tuh kiba dei ki nong India lem bad ki dohkha ïa kiba la thmu ban shalan tuh sha ka Bangladesh na u pud u sam jong ka ri India.
Ïa ki snar khaii tuh bad ïa ki dohkha ba la ïoh kurup la aiti noh sha ka ophis Customs, Shella ban leh ïa kaba donkam.
Kine ki jingïohkem ïa ki nongleh kam bymman ka dei ka jingpyrkhing jong ki shipai BSF ban tem ïa ki kam runar ruser bad ban ïada ïa ki kam khaii tuh ha shilynter jong ka khappud.
