Kurup ka ED ïa ki jingdon jingem ba 1.06 klur tyngka ha Meghalaya halor ka kam shukor pisa ïa ki paidbah

Shillong, Jymmang 10 : Ka Directorate of Enforcement (ED), Shillong Sub-Zonal Office, ka la kurup ïa ki jingdon jingem kiba lah ban die, ba shongdor 1.06 klur tyngka haba ïadei bad ka jingkynnoh kam shukor pisa lyngba ka “Global Media App” kaba dei ka Online Investment kompani ba don ha Meghalaya.
ïa kane ka jingkurup la leh hapoh ka kyndon ka Prevention of Money Laundering Act (PMLA), 2002 kum shibbynta jong ka jingtohkit ba dang ïaid halor ka skhim shukor ba kynnoh thok ïa ki nongkynshew lyngba ka jingkamai online bad ka rynsan kynshew pisa.
Kat kum ka jingong ka ED, ïa ka jingtohkit ïa pynlong halor ka ejahar ba la mudui ha Madarting Police Station ha East Khasi Hills District, hadien ka jingujor ba shah thok shah shukor pisa ha ka “Global Media App”.
Ki kynhun tohkit ki kynnoh ba u briew ba donkti ban pynïaid ïa kane ka App hapoh ka nam jong ka Online Advertising platform, ula kular ban ïoh jingsiew man ka sngi da kaba peit ïa ki video advertisement. La pynngop ïa ki lanot ba kin kynshew kham bun ka pisa ha ka VIP membership plan da ka jingkular ba kin ïoh ïa ka jingsiew ba kham heh bad ruh ka Commission lada ki pynïoh briew ban kynshew.
Ka ED ka ong ba une u nongshukor ula pynïaid ïew ïa ka app tang lyngba ki telegram ba la pyndonkam da ki nombor mobile phone ba nabar ka ri bad la lum a ka pisa lyngba ki bank transfer, UPI transaction bad cryptocurrency wallet. Kane ka app ka la sdang treikam naduh ka 3 tarik Jylliew 2022 bad haduh ka 12 tarik Risaw, 2022 hashuwa ka jingkhang khyrdep bad jingphet krad u trai ryngkat bad ka pisa.
Ka ED ka ong ba ka jingtohkit haduh mynta ka la lapdien ïa ka kam bymman kaba kot jan 45.33 klur tyngka ba la pynmih lyngba kane ka skhim. Ka ED ka la lapdien ruh ïa bun ki bank account, ki merchant ID, payment gateway account bad crypto wallet bala pyndonkam ban thep bad pynkynriah ïa ka pisa.