Hukum ka ïingbishar ïa ka sorkar ban ai jubab hapoh 3 taïew halor ka kam khaïi drok ha Garo Hills

Shillong, Jymmang 10 : Ka ïing Bishar High Court ka la bthah ïa ka Sorkar Jylla ba kan ai jubab hapoh ka lai taiew halor ka jingïaid ki kam tohkit halor ka kam khaïi drok bala mudui ha ki saw tylli ki Police Station ha ri-lum Garo bad ka jingïaid pahara ki Pulit ha ki jaka ba jur ka jingkhaïi droks.
Kane ka jingbthah kala mih ha ka 7 tarik Jymang na ka ïing Bishar Division Bench ba kynthup ïa ka Chief Justice Revati Mohite Dere bad Justice W Diengdoh haba shong bishar ïa ka PIL bala mudui da u Mewaker Lyngdoh.
Hadien ka hukum ka ïing Bishar ba 7 tarik Iaiong, ki shipai Border Security Force (BSF), Narcotics Control Bureau (NCB) bad Custom, kila aiti ïa ka kaiphod ha ka 6 tarik Jymmang ba pyni ïa ki lad jingpyrrkhing bad ki jingkurup.
Ha ka jubab, ki BSF ki la pyntip ba ki la kurup ïa ki jingdih buaid ha ki phra tylli ki jingjia hapdeng ka 19 tarik Kyllalyngkot 2025 bad 28 tarik Rymphang 2026.
“Ki bor shipai BSF ki la register case bad ka Dalu Police Station, Gasuapara Police Station, Mahendraganj Police Station bad Purakhasia Police Station” ong ka hukum.
ïa u droks ba la kurup la aiti sha kine ki Police Station hadien bala dep ujor ïa ka ejahar.
Ka ïing Bishar ka pynpaw ba u Additional Senior Government Advocate ula pan por ban ïoh ïa ki jingbthah halor “kaei kaba la long la man ïa kine ki case ba la register ha kine ki Police Station, kaei kaba jia ïa u droks ba la kurup bad aiti da ki BSF bad kiei I sienjam ba la shim ban pynjot pynjulor ïa u”.
Ka affidavit ka NCV ka pynpaw ba ka la register ïa kawei ka case beit beit ba ïadei bad ka Meghalaya naduh ka 1 tarik Kyllalyngkot 2025 da ka jingïoh kurup haduh 1.957 kilogram u dawai kuli Methamphetamine.
“Ka jingtohkit ïa kane ka case ka pyni ïa ka jingkhaïi ïa une u jingdih buaid na Silchar ha Assam shaphang ka Mawsynram ha Meghalaya bad ruh sha ki jaka khappud” ong ka hukum.
“Une u drok u shongdor haduh T.1.56 klur. Ka NCB kala pynpaw ruh ïa hynriew tylli ki jingkurup ha Barak Valley, Assam, ka jaka kaba la kheiñ kum kaba don marjan ka Jylla Meghalaya bad ka jaka kaba pynïaid lynti ïa u droks, kaba ktah pat ïa ka Jylla”. Kine ki jingkurup ïa u methamphetamine bad heroin ki shongdor da ki klur tyngka.
Ban pynkhlaiñ ïa ka jingïatreilang, ka NCB ka pyntip ba ka la buh ïa ka North Eastern Regional Office hapoh ka jingkhmih u Deputy Director General (NER) ha Guwahati.
“La buh ruh ïa ki Field Office ha Aizawl bad Dimapur ha u 2025, khamtam haba khmih ïa ka jingkhaïi droks na shillong u pud lyngba ka khappud Myanmar” ong ka affidavit.
La bynrap ba la thaw ruh ïa ka Anti-Narcotics Task Force ha Meghalaya ha u 2023 bad ka jingbuh ïa ka ANTF Police Station ba kyrpang ha u snem 2025 na ka bynta ki kam ban tohkit ïa ki case hapoh ka NDPS Act.
Ka Sorkar India kala ai 83.50 lak tyngka sha ka Jylla hapoh ka Assistance to States/Union Territories Scheme for Narcotic Control.
Ka Tnad Custom kala pyntip ba 36 tylli ki Preventive Unit hapoh ki phra tylli ki Division ki la pynlong ïa ki jingkhynra drok hapdeng u snem 2023 bad 2026 bad ki la register haduh 9 tylli ki case heroin ha u 2023-24, phra tylli ha u 2024-25 bad shiphew tylli ha u 2025-26.
Ka jingkurup ïa u ganja ka kot sha ka khyndai, hynniew bad khatsaw ha kine ki juh ki snem. Ka jingkurup ïa kiwei pat ki jingdih, kynthup u Yaba Tablet bad brown sugar ka la kiew na ki khyndai tylli ki case ha u 2023-24 sha ka khathynniew tylli ha u 2025-26.
Ka ïing Bishar ka la bthah ïa ka Jylla ba kan ai ïa ka affidavit bad ban ai lypa ïa ka copy sha u nongïasaid jong u nongmudui. ïa kane ka mukotduma PIL yn sa shong bishar biang ha ka 8 tarik Jylliew, 2026.