Nongpoh, Risaw, 25: Da kaba buh hakhmat ïa ka thong ban pyntroiñ ïa ki nongkhaii drok kiba ju mlien ban ïaid lynti lyngba ka jylla Meghalaya, ki Pulit jong ka Ri-Bhoi District ha ka janmiet sngi Baar ki la ïoh ban kurup ïa u drok Heroine uba shongdor kumba T. 45 lak ba la thep ha ki 8 tylli ki synduk sabon.
Halor kane ka jingjia, ki Pulit ki la ïoh kem ïa uwei u briew uba la suba ba u dei uba donkti ban khaïi ïa u drok.
Ka jingïoh kurup jong ki Pulit ka Ri Bhoi ïa u drok ka dei hadien ba ki la ïoh jingtip ba la don ki snar khaii kiba thmu ban shlan tuh ïa u drok bad mar mar ki la pynlong ïa ka jingpynap shrip ha Byrnihat Police Outpost ha kaba ki la ïoh bat ïa kawei ka kali Tourist kaba don ïa u number ML05 Q-0253 bad ha ka jingtalasi ki Pulit ki la lap haduh 8 song u drok.
U suba nongkhaïi drok ba la shah kem ha ki Pulit u dei uba la tip kyrteng kum u Alphanus Marak na Mawsynram East Khasi Hills.
Hadien ba ladep tohkit bad tih bniah halor ka jingïoh kurup ïa u drok, ki Pulit jong ka Ri Bhoi ki la register case hapoh ka aiñ NDPS Act bad ka jingtohkit ka dang ïaid shakhmat.
