Khliehriat, Naitung, 31: Ki Pulit ka Anti Narcotic Task Force (ANTF) ka East Jaiñtia Hills District ba la lamkhmat da u Deputy Superintendent of Police (Crime), u Bidhan Bhattacharjee kiba la pynlong ïa ka jingtalasi ïa kawei ka Bos Night Super ha ka sngi Balang ha Umtyra ki la ïoh kurup 250 gram u drok heroin.
Halor kane, ki Pulit ki la kem ïa uwei u donkti uba la tip kyrteng kum u Abul Kashim Md Abbas na Patharkhandi Dist Karimnganj, Assam.
Ki Pulit ki la ïathuh, hadien ba la ïoh ïa ka jingtip kaba bniah ba don u briew uba la rah ïa u drok bad uba shong da kawei ka Bos Night Super, marmar ki la pynlong ïa ka jingpynap ktem ha Umtyra bad ki la ïoh ban bat ïa ka bos.
Ha ka jingtalasi ryngkat ka jingsakhi lang jong ki riewpaidbah, la lap ar tylli ki pla ha kaba ha kawei na ki pla la thep ïa u drok uba long kum ki powder rong stem ha ki ar phew san tylli ki synduk thep sabon. Hadien ba la leh tes la pynthikna ba u dei u drok heroin.
Ki Pulit ki la kurup noh ïa u drok, kawei ka mobile phone bad ïa u Abul Kashim Md Abbas la kem bad la rah sha Khliehriat Police Station bad la pynngat hapoh ki kyndon aiñ NDPS Act.
Ka jingtohkit halor kane ka dang ïaid shakhmat ban lap shuh shuh ïa kiwei pat kiba donkti.
