Ha ki 10 snem jong ka Sorkar Modi, ka India ka la sakhi ïa ka jingkhie ka imlang sahlang ha kaba ka la wan biang ka jingsngew sarong shaphang ka jinghiar pateng ka deiriti kaba riewspah. Naduh ka jingpynthymmai biang ïa ki jaka mane ha Jammu and Kashmir haduh ka jingpynkhlaiñ biang ïa ki lynti ba leit sha ki jaka ba kyntang kum ka Kashi Vishwanath Dham bad ka jingshna biang ïa ki jaka mane ha kylleng ka ri, kine ki sienjam ki la pynïasoh biang ïa ngi bad ki nongrim jong ngi. Ngi la ai burom ïa ki riewkhuid ba ngi la klet kum ka Meera Bai bad ki riewshlur na ki jaitbynriew rilum kum u Bhagwan Birsa Munda, katba ki rukom tynrai kum ka Mahakumbhki dei kiba ngi la kyntiew ha kylleng ka pyrthei kaba pyni ïa ka jingïar ka jinglong kyntang ka India. Ki jingrakhe ba la pynkheiñ ïa ki rekod kum ka Diwali ha Ayodhya bad ka jingbuh ïa u Sengol ba kyntang ha Parliament ki pyni ïa ka jingburom ïa ki nongrim jong ka deiriti. Mynta u snem ka jingïaid lynti shiphew snem ban pynurlong ïa ki sienjam kiba pynthikna ba ki nongrim jong ka India ki ai mynsiem ïa ki pateng ban wan.
Une u snem u la sdang da ka jingpynkyntang ïa ka Shri Ram Lalaha Ayodhya, kaba la pynurlong ïa ka jingthrang da ki spah snem jong ki million ngut ki briew bad ka jingplie paidbah ïa ka jaka mane ki Hindu ba nyngkong ha Abu Dhabi, kaba dei ka dak jong ka jingpoi ki kam kyntang jong ka India sha kiwei kiwei ki ri. Ka la don ruh ka jingai jingithuh ka UNESCO ïa ki Moidam bad ka jingwanrah biang ïa 297 tylli ki tiar ba hyndai kiba la shah tuh na ka ri.
Leitphai u Shri Ram sha ka jaka kha jong u: Ka jingïalam lynti u Myntri Rangbah Duh Modi ha u 2024 ka la wanrah ïa ka jingkhie biang jong ki nongrim jong ka imlang sahlang ha India bad ka jingsngew sarong shaphang ka deiriti. Ka jingpynkyntang biang ïa u Shri Ram Lalaha ka Ayodhya Ram Mandir ka la long ka por kaba kyrpang kaba la pynurlong ïa ka jingthrang kaba la da ki spah snem jong ki Hindu na kylleng ka pyrthei. Kane ka la ban jur halor ka jinglong kongsan ka Ayodhya ha ka histori jong ka India. Ka jingplie paidbah ïa ka BAPS Mandir da u Myntri Rangbah Duh Modi, ka jaka mane jong ki Hindu kaba nyngkong ha Abu Dhabi, ka la dei ka por kaba kyrpang ha ka jingïadei ka India bad kiwei kiwei ki ri. Kane ka jaka mane ka dei ka ïingmane ki Hindu kaba nyngkong ha ka thaiñ Middle East bad la saiñdur ïa ka katkum ki nongrim tynrai ba hyndai jong ki Hindu ba tip kum ka Shilpa Shastras.
La rakhe ïa kane kum ka jingnoh synniang jong ki briew jong ka India kiba don shabar ka ri bad ka dei ruh ka dak jong ka jingïashah hapdeng ki jingngeit bapher bapher ha ka pyrthei. Hapoh ka ri, la buh ïa u maw nongrim jong ka Maa Kamakhya Divya Pariyojana, ka projek lynti kaba kyntiew ïa ki lad ka leit ka wan sha ka Maa Kamakhya Temple ha Assam, bad ka jingpynneh ïa ka hiar pateng ba kyntang jong ka. Kine ki sienjam ki dei ka dak jong ka jingkut jingmut u Myntri Rangbah Duh Modi ban khyllie im biang ïa ka juk ba phyrnai jong ka India bad ban wanrah ïa ka jingsngew sarong shaphang ka histori jong ka ri.
Ka jingkhyllie biang ïa ka jinghiar pateng ka deiriti: Ha u 2024, hapoh ka jingïalam ba shemphang jong u Myntri Rangbah Duh Modi, ka India ka la jam shaphrang ha ka jingpynneh bad ka jingrakhe ïa ka jinghiar pateng ka deiriti. Ki sienjam jong ka Sorkar Modi ki la wanrah ïa ka jingithuh ïa ki Moidam ha Assam kum ka UNESCO World Heritage Site kaba 43 ha India, kaba pyni ïa ka bynta kaba heh jong ka deiriti jong ka India na ka bynta ka pyrthei. Ka jingplie paidbah ïa ka “Anubhav Kendra” ha Kurukshetraka la khyllie im biang ïa ki jingthoh hyndai kum ka Mahabharata bad Bhagavad Gita kaba pyni ïa ka jingïeng skhem ka Sorkar ban plie lad ban ïoh jingtip shaphang ka hiar pateng jong ka India.
Shuh shuh, ka jingshna biang ïa ka Kochrab Ashram ha Gujarat ka la pyni ïa ka jingñiewkor ka Sorkar ban pynneh ïa ki jingngeit tynrai jong u Gandhi, katba ka jingbuh ïa u mawnongrim jong ka Shri Kalki Dhamha Sambhal ka pyni ïa ka jingpeitbniah ban kyntiew ïa ki jaka pdeng jong ka jinglong kyntang bad ka deiriti. Kine ki sienjam ki pyni ïa ka jingpeit bniah ka Sorkar Modi ban pynneh ïa ka jingnang jingstad ba hyndai jong ka India bad ka jingpynkhreh ïa ka lynti na ka bynta ka lawei.
Ha u snem mang tyngka 2024, ka Khadi and Village Industries Commission (KVIC) ka la lah die palat T 1.5 lak klur ki mar bad ka la plie lad ban ïoh 10 lak tylli ki kam, kaba long ka dak jong ka Atmanirbhar Bharat. Kane ka jingkiew shaphrang ka pyni ïa ka jingkiew ka khadi ha kylleng ka pyrthei kaba ïoh bor na ka vocal for local, kaba pynïasoh ïa ki rukom tynrai bad ka jingïaineh bad ka jingsaiñdur thymmai katkum ka juk mynta.
Ka jingrakhe ïa ka jinghiar pateng ka ktien ka thylliej bad ka jingngeit: Ha u 2024 ka India ka la rakhe ïa ka jingïar ka ktien ka thylliej jong ka ri da kaba ai jingithuh Classical Language ïa ka Assamese, Bengali, Marathi, Pali bad Prakrit. Kane ka jingai jingithuh ka long ka jingai burom ïa ka jinghiar pateng ka ktien ka thylliej bad ka pynkhlaiñ ruh ïa ka jingpynneh ïa ka deiriti. Shuh shuh, ka jingplie biang ïa baroh saw tylli ki khyrdop jong ka Shree Jagannath Temple ha Puri ha ka 13 tarik u Jylliew, 2024 ka dei ka jingpynurlong ïa ka jingdawa ba la slem na ki nongngeit bad ka la wanrah biang ïa ka jingïoh ban rung suk sha kane ka jaka ba kyntang.
Ka jingpynkylla kyrteng ïa ka Port Blair sha ka ‘Sri Vijaya Puram’ ha ka 13 tarik u Nailur, 2024 ka la ban biang halor ka jingkut jingmut ka India ban burom ïa la ka histori, khamtam ka jinglong kyrpang kane ka thaiñ ha ka jingïakhun na ka bynta ka jinglaitluid jong ka ri.
Ka India ka dang pynkhreh ruh ïa ka Maha Kumbh Mela 2025, ka ban long ha Prayagraj naduh ka 13 tarik u Kyllalyngkot haduh ka 26 tarik u Rymphang, 2025. La khmih lynti ba kane kan long ka jingïalum kaba kyntang kaba heh tam ha ka pyrthei ka ban khring kumba 45 klur (450 million) ngut ki briew.
Ka jingïadei bad kiwei kiwei ki ri lyngba ka deititi bad ka jingïoh jingithuh na kylleng ka pyrthei: Ha u 2024, ka India ka la jam shaphrang ha ki jingïadei bad kiwei kiwei ki ri lyngba ka deiriti, kaba la pynskhem ïa ka jinglong nongïalam jong ka ha ka pyrthei. Ka India bad ka USA ki la ïasoi ïa ka ‘Cultural Property Agreement,’ kaba nyngkong kaba thmu ban ïada ïa ki jingdon jingem kiba ïadei bad ka deiriti na ka jingdie beaiñ. Ha ka 15 tarik u Naiwieng, 2024, ka U.S. ka la pynphai sha ka India palat 1,400 tylli ki tiar hyndai kiba la shah tuh kiba kot sha kumba $10 million. Ha u Nailur 2024, ha ka prokram ba ïadonlang u Myntri Rangbah Duh Narendra Modi bad u President ka US u Joe Biden, la pynphai 297 tylli ki tiar ba hyndai sha ka India. Ha kawei pat ka sienjam, 100 ngut ki longkmie ba saiñdur ki la ïalam ïa ka Republic Day Parade ha ka sien kaba nyngkong kaba pyni ïa ka jingkut jingmut ka Sorkar ban pynkupbor ïa ki longkmie bad ban wanrah ïa ka jingryntih kyrdan hapdeng ki shynrang bad kynthei.
Kine ki sienjam ki pyni ïa ka bor jong ka India kaba dang kiew kaba ïadei bad ka deiriti lyngba ka jingthmu u Myntri Rngbah Duh ban ïalam ïa ka ri sha ka jingïoh jingithuh shuh shuh ha ka pyrthei bad ka jingburom ïa ki rukom tynrai ba riewspah jong ka ri.
Ka jingkiew ki jingdon jingem bad ka ïoh ka kot kaba ïasoh bad ki projek kiba ïadei bad ka deiriti.Ha u 2024, hapoh ka jingïalam jong u Myntri Rangbah Duh Modi, ka India ka la wanrah ïa ki sienjam na ka bynta ki jingkylla kaba pynïasoh ïa ki projek kiba ïadei bad ka deiriti bad ki jingdon jingem bad ka ïoh ka kot. Ka jingpynbna shaphang ka jingkyntiew ïa ka lynti na ka bynta ka Vishnupad Temple ha Bihar bad ka Mahabodhi Temple ha Bodh Gaya kan kyntiew ïa ka kam jngohkai na ka bynta ki kam kyntang bad kan kyntiew ïa ka ïoh ka kot ha kine ki thaiñ. Da kaba kyntiew ïa ki lad ka leit ka wan sha kine ki ar tylli ki jaka ba kyntang ha India, kine ki projek kin pyndap ïa ki jaka ba suda ka jinghiar pateng ki jaka ba kyntang jong ka India bad ki jingdon jingem katkum ka juk mynta.
La buh ruh ïa u maw nongrim jong ka National Maritime Heritage Complex ha Lothal, Gujarat, kaba long ka sienjam kaba heh ban pynneh ïa ki kam jong ka India kiba ïadei bad ka jingpyndonkam ïa ki duriaw na ka bynta ka leit ka wan. Yn kyntiew ïa ka Lothal kum ka kad lieng kaba hyndai tam jong ka pyrthei bad ka jaka jong ka Indus Valley Civilization kaba pyni ïa ki kam jong ka India kiba ïadei bad ki duriaw kiba la palat 4,500 snem. La khmih lynti ba ka jingpyntreikam ïa kane ka projek kan plie 22,000 tylli ki kam, 15,000 ha ki jaka trei bad 7,000 kiba ïadei bad kine ki jaka trei ka ban kyntiew ïa ka ïoh ka kot ha ki jaka bad wanrah ïa ka roi ka par kaba ïaineh ïa ki briew ha kine ki jaka.
Ki jingrakhe ïa ka deiriti bad ki sienjam: U Myntri Rangbah Duh u la plie paidbah ïa ka Bodoland Mohotsav kaba nyngkong ha Delhi, kaba long ka jingrakhe ïa ka jinglong kyrpang ka deiriti, ki rukom tynrai bad ka histori jong ka thaiñ Bodoland. U la plie paidbah ruh ïa ka Ashtalak shim Mahotsav kaba pyni ïa ka deiriti ba riewspah jong ka thaiñ shatei lammihngi. Kine ki jingrakhe ïa ka deiriti ki pynkhlaiñ ïa ka jingthmu jong u Myntri Rangbah Duh Modi ban pynneh bad kyntiew ïa ka deiriti ba ïar jong ka India bad ka jingpynïasoh ïa ki jaitbynriew bapher bapher.
