Na ka jingtuklar ka KSU, ïoh thoh eksam wad kam ki samla trai jylla ha CPGSAS, Umïam

Nongpoh, K’lyngkot, 03: Ka long shisha ka jingkmen ïa ki samla wad kam ka jylla kiba leit ban thoh ïa ka eksam wad kam na ka bynta ki post Lower Division Clerk (LCD), Upper Division Clerk (UDC) bad ka post Field Cum Lab Assistant (FCLA) ha ha College of Post Graduate Studies In Agricultural Science (CPGSAS), Umïam, ha kaba ka jingthoh eksam kam jongki, ka la long kaba ïaid beit ïaid ryntih khlem kano kano ka jingthud hadien ba la pynkynriah ïa ka jaka thoh eksam na Guwahati sha CPGSAS, Umïam.
Haba pynkynmaw, halor kane ka phang, dang ha ki khyndiat sngi ka KSU Lyngba ka Employment Monitoring Cell lem bad ka KSU North Khasi Hills District Unit, ki la hap ban leit kynduh ïa u Dean katei ka CPGSAS, Umïam, na ka bynta ban dawa ban buh ïaka ka jaka thok eksam kam ki samla ha Umïam bad ym sha Guwahati kaba la pynjynjar ïa ki samla trai jylla.
Dei lyngba ka jingshim khia ka KSU, kiba la ioh ban ïa kynduh ïa u Dean bad ba ki la khang tala ruh ïa ka ophis treikam u Dean ka ka CPGSAS, Umïam, ha kaba khatduh u la khot ïa kren ïa ki nongïalam ka KSU bad lyngba ka jingdawa ka KSU ka la long shisha ka jingkyrkhu ïa ki samla wad kam ba ki la ioh ban thoh ïa ka eksam wad kam ha la ka jylla bad ym shuh sha Guwahati kumba la pynbeit da da ka CPGSAS kaba dei tang da ka jingdawa ka KSU.
Ïa kane ka jingïoh ki samla wad kam ban thoh eksam ha Umïam la sakhi ruh mynta ka sngi, ba ki nongïalam ka KSU NKHD, ba la lam khmat da u Samla Richardroy Lyngdoh Nonglait, Publicity Secretary ka Seng, ki la leit ban sakhi mynta ka sngi dang step ïa katei ka jaka thoh eksam wad kam ki samla ha Umïam, kaba la ïaid beit ïaid ryntih haduh ba la kut ka eksam bad khlem don kano kano ka jingthud ba ki samla trai jylla ki la ioh lad ban thoh eksam ha la ka jylla bad ym sha ka jylla Assam.