“Kumba long ka kyrteng 1-Nartiang Constituency yn pynlong ba nyngkong ïa ka hapoh ka jylla”
Hadien ka Election yn plie ïa ka Stadium ha Wahiajer ong u ma Sniawbhalang Dhar
![](https://mawphor.com/wp-content/uploads/2023/02/Sniawbha-1.jpg)
Jowai, Rymphang 22: U ma Sniawbhalang Dhar ha ka jinglap Election jong u mynta ka sngi ha shnong Namdong-B, West Jaiñtia Hills District ula pynsngew ba hadien jong kane ka Election MLA yn sa plie noh ïa ka Stadium heh hapoh ka shnong Wahiajer bad hangne yn sa paw pyrthei kaei ba ki paidbah ka jylla kin kren na ka bynta ki khun samla kiba don ïa ka sap ïalehkai.
U ma Dhar u ong la shna kyrpang ïa kane ka Stadium na ka bynta ki nongshong shnong baroh bad u kyrmen ba ka jingshadkmen hadien ka jingjop jong u kan long ha katei ka madan kaba la dep mynta la 90 persent ka jingtrei.
Ula ong kiba bun na ki Constituency kila her syrngiew namar ba ka 1-Nartiang kadei kawei na ki Constituency kaba la ïoh shibun ki kam pynroi kila tuid ha kine ki snem ba la dep, ula ong kum ka kyrteng jong ka 1-Nartiang kumta ïa kane ka Constituency yn ïaleh ba kan wan ha ka kyrdan kaba nyngkong tam hapoh ka jylla.
Kum u nongmihkhmat un ïeng na ka bynta ki paidbah bad kane ka long ka nongkylliang ha kaba ki paidbah kila dep ban ai jingkyrshan ïa u, sa shisien u kyntu ïa ki paidbah ba kin jied ïa ki nongmihkhmat da ka jingstad bad ka jingïohi jngai na ka bynta ka lawei.
Ha kaba ïadei bad ka shnong Namdong-B ula pynsngew ba ka dei kawei na ki shnong kaba ai jingkyrshan ba pura ïa u ha kine ki samoi (term) ba la dep, da kaba kyntu ba kim dei ban shah ïalam bakla hynrei kin mih ha ka sngi 27 tarik ban thep beit ïa ka vote ha ka party NPP.
Ha ka liang ki lynti synkieng hapoh kane ka thaiñ Namdong-B ula ong kiba bun hi kila dep lut, wat ïa ka Namdong PHC la dep ban pynkiew kyrdan sha ka CHC, katba ha ka jingïadei kam jong ki paidbah ïaka C&RD Block la dep ban plie ïa ka dang ha kine ki kyndiat bnai ba la dep da u Myntri Rangbah ka jylla.
U kyrmen skhem ha kane ka kynti kaba dei ka sien ba saw ïa u kum u MLA un sa wan ha ka kyrdan ba kham shalor bad ki kam pynroi ruh kin thuid khambun shuh shuh hapoh ka Constituency.
Ha ka juh ka por ula pynthikna ban jop beit ha kane ka Election 2023, katba hapoh ka jylla hi baroh kawei (State Level) u ong ba ka NPP kan jop kumba 32 seat shaneng bad ïa ka sorkar yn thaw hi marwei da ka NPP khlem da don shuh kiba ïasoh, da kaba ai nuksa “yn don shuh kiwei ki khaw ban ïakhlehlang bad yn ïoh tang u khaw saw”.
Ula ong dang bun ki kam kiba ula angnud ban pyndep ha kane ka samoi kaba saw, kum u Chairman ka District Regional Boundary Committee ula kren shai ynda ula wan biang ha ka jingjop ïa kane ka jingpynbeit ïa u pud u sam ha ka sien kaba ar yn pyndep noh ïa ki bynta kaba dang sahteng kata ban pynwan ïa kito ki jaka naduh ka Block I & II shapoh ka jylla Meghalaya.
Ha kane ka sngi na ka liang jong ki nongïalam ka NPP Nartiang kila pynthikna ba ki paidbah kiba la wan sha kane ka jingïalang kila poi sha ka 15 hajar tam. Kiwei de ki kiba ai jingkren ki kynthup ïa u CEM ka JHADC ma T. Shiwat, ki nongïalam Shnong na Thadmynri, Shiabnai, Moodymmai bad na kiwei de, katba ïa ka jingïalang la pynïaid da u ma D.S. War, Waheh Shnong Nangdong-B.