Shillong Lber 13: Na ka liang ka Executive Member (EM) ka tnat Market jong ka KHADC, ka Kong Grace Mary Kharpuri ha ka sngi Balang ka la pyntip hapoh ka dorbar mang tyngka ba ka Council ka la ïoh ban lum kumba T.35 lak ka khajna na ki Ïew jong ka Council ha u snem 2022-2024.
Ïa kane ka la jubab ïa ka jingkylli ba wanrah da u MDC ka Laban u Bah Mitchell Wankhar, ka Kong Grace ka la pyntip ba ha u snem 2022-2023 ka KHADC ka la ïohlum T.16,10,900 bad ha u snem 2023-2024 ka la ïohlum T.18,98,900 na ki ïew ka Council.
Ka Kong Grace kala pyntip ba ka jingïohlum khajna ka dei na ka Ïew Laitlyngkot, Ïew Byrnihat bad na Mawïong Regulated Market.
Na ka liang jong ka kala pyntip ba ha u snem 2023-2024, ka Council na ka Ïew Byrnihat ka la ïohlum T.6,20,000, bad na ka Ïew Laitlyngkot la ïohlum T.3,20,000 bad na ka Mawïong Regulated Market la ïohlum T.5,30,000.
Nalor kane ka Kong Grace ka la pyntip ruh ba ki don 45 tylli ki ïew Hima bad 14 tylli ki ïew ki shimet kiba la ïoh jingbit na ka KHADC.
